ഡല്‍ഹി: സൈഡസ് കാഡിലയുടെ സൂചിരഹിത കോവിഡ് വാക്‌സിനായ സൈകോവ് ഡി ഒക്‌ടോബര്‍ ആദ്യവാരത്തോടെ ലഭ്യമാകുമെന്ന പ്രതീക്ഷയില്‍ കേന്ദ്രം. 12 വയസിന് മുകളിലുള്ള എല്ലാവര്‍ക്കും നല്‍കാവുന്ന വാക്‌സിനാണ് സൈകോവ് ഡി. കുട്ടികള്‍ക്കുള്ള ആദ്യ വാക്സിന് കൂടിയാണ് ഇത്.
അതേസമയം വാക്സിന് നല്‍കുന്നതിന്റെ മുന്‍ഗണനക്രമം കേന്ദ്രം ഇതുവരെ തീരുമാനിച്ചിട്ടില്ല.
സൈകോവ് ഡിയുടെ അടിയന്തര ഉപയോഗത്തിന് ഡ്രഗ് കണ്‍ട്രോള്‍ ഓഫ് അതോറിറ്റി അനുമതി നല്‍കിയിരുന്നു. വാക്സിന് അനുമതി നല്‍കാന്‍ വിദഗ്ധ സമിതി ശുപാര്‍ശ നല്‍കിയതിന് പിന്നാലെയാണ് അനുമതി നല്‍കിയത്.
കോവിഷീല്‍ഡ്, കോവാക്‌സിന്‍, സ്പുട്‌നിക് വി, മൊഡേണ, ജോണ്‍സണ്‍ ആന്‍ഡ് ജോണ്‍സണ്‍ തുടങ്ങിയ വാക്‌സിനുകള്‍ക്കാണ് അനുമതി നല്‍കിയിരുന്നത്. ഇവയെല്ലാം 18വയസിന് മുകളിലുള്ളവര്‍ക്ക് മാത്രമാണ് നല്‍കിയിരുന്നത്. ഇവക്ക് രണ്ട് ഡോസുകളാണ് വാക്സിന് നല്‍കിയിരുന്നത്. എന്നാല്‍ സൈകോവ് ഡിക്ക് മൂന്നുഡോസുകളുണ്ടാകും.
ലോകത്തിലെ ആദ്യ ഡി.എന്‍.എ അടിസ്ഥാനമായ വാക്‌സിനാണ് സൈകോവ് ഡി എന്നാണ് ബയോടെക്‌നോളജി വിഭാഗം അവകാശപ്പെട്ടിരിക്കുന്നത്.