ന്യൂഡല്‍ഹി: ഉത്തര്‍പ്രദേശില്‍ ട്രെയിന്‍ യാത്രികനായ യുവാവിനെ ജയ് ശ്രീറാം വിളിക്കണമെന്നാവശ്യപ്പെട്ട് ആക്രമിച്ചതായി പരാതി. ഡല്‍ഹിയില്‍ നിന്ന് മൊറാദാബാദിലേക്ക് പോവുകയായിരുന്ന പത്മാവത് എക്‌സ്പ്രസില്‍ വെച്ചാണ് അക്രമണം ഉണ്ടായത്. അസിം ഹുസൈന്‍ എന്ന യുവാവിനെതിരെയാണ് തീവ്ര വലതുപക്ഷ ഹിന്ദുത്വ സംഘത്തിന്റെ ആക്രമണം.
ഹാപൂര്‍ സ്‌റ്റേഷനില്‍ നിന്ന് കുറച്ച് ആളുകള്‍ ട്രെയിനില്‍ തന്നെ ഭീഷണിപ്പെടുത്തുകയും അസഭ്യം പറയുകയും ചെയ്തതായി ഹുസൈന്‍ മാധ്യമപ്രവര്‍ത്തകരോട് പറഞ്ഞു. മുല്ല എന്ന് കളിയാക്കി വിളിക്കുകയും പിന്നാലെ അക്രമിക്കുകയുമായിരുന്നു. തീവ്ര ഹിന്ദുത്വ സംഘത്തിന്റെ ആക്രമണത്തില്‍ ബോധം കെട്ട് വീണ ഹുസൈനെ മറ്റാരോ വിളിച്ചുണര്‍ത്തുകയായിരുന്നു. അക്രമി സംഘം താടിയില്‍ പിടിച്ച് വലിക്കുകയും ‘ജയ് ശ്രീറാം’ എന്ന് വിളിക്കാന്‍ ആവശ്യപ്പെട്ടപ്പോള്‍ ഹുസൈന്‍ നിരസിച്ചതായും കൂട്ടിച്ചേര്‍ത്തു.