അന്തരിച്ച സിപിഐഎം ജനറല്‍ സെക്രട്ടറി സീതാറാം യെച്ചൂരിയുടെ മൃതദേഹം ശനിയാഴ്ച ഡല്‍ഹിയില്‍ പൊതുദര്‍ശനത്തിന് വെക്കും. രാവിലെ പതിനൊന്നു മണി മുതല്‍ മൂന്നുമണി വരെ ഡല്‍ഹി എകെജി ഭവനിലാണ് പൊതുദര്‍ശനത്തിന് വെക്കുക. ശനിയാഴ്ച വൈകുന്നേരമായിരിക്കും മൃതദേഹം എയിംസിന് കൈമാറുക. ഡല്‍ഹി എയിംസ് മോര്‍ച്ചറിയിലുള്ള മൃതദേഹം വസന്ത്കുഞ്ചിലെ വസതിയിലേക്ക് എത്തിക്കും.
ശ്വാസകോശ അണുബാധയെ തുടര്‍ന്ന് ഡല്‍ഹി എയിംസില്‍ തീവ്രപരിചരണ വിഭാഗത്തില്‍ കഴിയുകയായിരുന്ന യെച്ചൂരി ഇന്ന് ഉച്ചതിരിഞ്ഞ് 3.05നാണ് അന്തരിച്ചത്. കടുത്ത പനിയും നെഞ്ചിലെ അണുബാധയെയും തുടര്‍ന്ന് ആഗസ്റ്റ് 19നാണ് എയിംസിലെ അത്യാഹിത വിഭാഗത്തില്‍ പ്രവേശിപ്പിച്ചത്. കുറച്ചു ദിവസങ്ങള്‍ക്കുമുമ്പ് ആരോഗ്യസ്ഥിതി മെച്ചപ്പെട്ടിരുന്നെങ്കിലും നില വീണ്ടും വഷളാവുകയായിരുന്നു. വെന്റിലേറ്ററിന്റെ സഹായത്തോടെ ഐസിയുവില്‍ കഴിയുകയായിരുന്നു.