വാടാനപ്പള്ളി(തൃശൂര്‍): ഏങ്ങണ്ടിയൂരില്‍ പഞ്ചായത്താഫീസില്‍ സി.പി.എം ലോക്കല്‍ സെക്രട്ടറിയുമായി തമ്മില്‍ത്തല്ലിയ സി.പി.എം വനിതാ നേതാവിന്റെ മകന്‍ മരിച്ചു. സി.പി.എം നേതാവും ബ്ലോക്ക് പഞ്ചായത്ത് അംഗവും മഹിളാ അസോസിയേഷന്‍ നേതാവുമായ കെ.ബി.സുധയുടെ മകനുമായ അമല്‍കൃഷ്ണന്‍(31) ആണ് മരിച്ചത്.
ഫെബ്രുവരി ഒന്നിനായിരുന്നു സംഘര്‍ഷം. 45 ദിവസമായി ആശുപത്രിയില്‍ ചികിത്സയിലായിരുന്നു. കഴിഞ്ഞ ദിവസം ഏങ്ങണ്ടിയൂരിലെ വീട്ടിലെത്തിച്ച അമല്‍കൃഷ്ണന്‍ ഞായറാഴ്ച വൈകീട്ട് എട്ടോടെ മരിക്കുകയായിരുന്നു. ലോക്കല്‍ സെക്രട്ടറി ജ്യോതിലാലുമായാണ് ഏറ്റുമുട്ടലുണ്ടായത്.
സുധയുടെ അയല്‍വാസിയുമായുള്ള തര്‍ക്കം സംബന്ധിച്ച വാക്കേറ്റമാണ് ഇരുവരും തമ്മിലുള്ള അടിപിടിയിലെത്തിയത്. ജ്യോതിലാലും ഏരിയാ കമ്മിറ്റിയംഗം കെ.എച്ച്.സുല്‍ത്താനും ചേര്‍ന്ന് അമല്‍കൃഷ്ണനെ മര്‍ദിച്ചതായി ആക്ഷേപമുണ്ടായിരുന്നു. അമല്‍കൃഷ്ണന്റെ മൂക്കിന്റെ എല്ലിന് പൊട്ടലടക്കമുള്ള പരിക്കുണ്ടായിരുന്നു. ആദ്യം ചാവക്കാട് താലൂക്ക് ആശുപത്രിയിലും പിന്നീട് തൃശൂരിലെ സ്വകാര്യ ആശുപത്രിയിലും ചികിത്സയിലായിരുന്നു. പരിക്കുകള്‍ ഭേദപ്പെട്ടതിനെ തുടര്‍ന്നാണ് വിടുതല്‍ ചെയ്ത് വീട്ടിലെത്തിച്ചത്.സ്ഥലത്തെത്തിയ പൊലീസ് സമീപത്തെ സി.സി.ടി.വി ദൃശ്യങ്ങള്‍ പരിശോധിച്ചിരുന്നു. ഇരുകൂട്ടരും പരസ്പരം മര്‍ദിക്കുന്നത് ദൃശ്യങ്ങളിലുണ്ടെന്ന് പൊലീസ് പറഞ്ഞു.