കേപ്ടൗണ്‍: ഇന്ന് ഇന്ത്യ കളിക്കേണ്ടതായിരുന്നു ഈ ഫൈനല്‍. പക്ഷേ നിര്‍ഭാഗ്യം വിധിയെഴുതി പുറത്തായ ഇന്ത്യക്ക് പകരമെത്തിയ ഓസ്‌ട്രേലിയക്കാര്‍ രാത്രി 6-30ന് ആതിഥേയരായ ദക്ഷിണാഫ്രിക്കയെ നേരിടുന്ന രാത്രിയിലെ വിജയികളായിരിക്കും ടി-20 വനിതാ ലോകകപ്പിലെ വിശ്വ ജേതാക്കള്‍. അപരാജിതരായി കുതിക്കുന്ന കങ്കാരു സംഘത്തിനാണ് വ്യക്തമായ സാധ്യത.
ഇന്ത്യക്ക്് മുന്നില്‍ വിറച്ചെങ്കിലും അവസാന രണ്ട് ഓവറുകളില്‍ സമചിത്തതാ പ്രകടനത്തിലുടെ പക്വത തെളിയിച്ചവരാണവര്‍. ഇന്ത്യന്‍ നായിക ഹര്‍മന്‍പ്രീത് കൗര്‍ സ്വന്തം പിഴവില്‍ റണ്ണൗട്ടായതിന് ശേഷം മല്‍സരത്തിലേക്ക് തിരികെ വന്ന ഓസ്‌ട്രേലിയക്കാര്‍ അവസാന രണ്ട് ഓവറില്‍ പിടിമുറുക്കിയാണ് അഞ്ച് റണ്‍സിന് സെമി ജയിച്ചത്. ഇന്ത്യയെ തോല്‍പ്പിക്കുന്നതില്‍ നിര്‍ണായക പങ്ക് വഹിച്ച ആഷ്‌ലെ ഗാര്‍ഡ്‌നര്‍, എലിസെ പെറി എന്നിവരാണ് ഇന്ന് ദക്ഷിണാഫ്രിക്കക്ക് തടസം.
സ്വന്തം വേദിയില്‍ കരുത്ത് കാട്ടാനൊരുങ്ങുന്ന ആഫ്രിക്കയുടെ നിരയിലെ വിഖ്യാതര്‍ ലൗറ വോല്‍വാര്‍ട്ടും തസ്മന്‍ ബ്രിട്ട്‌സുമാണ്. പത്ത് മല്‍സരങ്ങളില്‍ നിന്നായി 242 റണ്‍സുമായി ആതിഥേയരുടെ നിരയിലെ മികച്ച ബാറ്ററായിരിക്കുന്നു ലൗറ. എട്ട് മല്‍സരങ്ങളില്‍ കളിച്ച തസ്മിനാവട്ടെ 234 റണ്‍സ് കരസ്ഥമാക്കിയിട്ടുണ്ട്.