ജോഹന്നാസ്ബര്‍ഗ്: ടി20 ക്രിക്കറ്റ് പരമ്പരയില്‍ ഇന്ത്യന്‍ വനിതാ ടീമിന് വിജത്തുടക്കം. ദക്ഷിണാഫ്രിക്ക ഉയര്‍ത്തിയ 164 റണ്‍സ് ഇന്ത്യ ഏഴു പന്തുകള്‍ ബാക്കി നില്‍ക്കെ മൂന്നു വിക്കറ്റ് മാത്രം നഷ്ടപ്പെടുത്തി മറികടന്നു. അര്‍ധസെഞ്ചുറി നേടി മുന്നില്‍നിന്ന് നയിച്ച മിതാലി രാജാണ് ഇന്ത്യയ്ക്ക് അനായാസ ജയം സമ്മാനിച്ചത്. 48 പന്തുകള്‍ നേരിട്ട മിതാലി, ആറു ബൗണ്ടറിയും ഒരു സിക്‌സും ഉള്‍പ്പെടെ 54 റണ്‍സെടുത്ത് പുറത്താകാതെ നിന്നു.
ഓപ്പണര്‍ സ്മൃതി മന്ദാന 15 പന്തില്‍ 28, ജെന്നി റോഡ്രിഗസ് 27 പന്തില്‍ നാലു ബൗണ്ടറിയും ഒരു സിക്‌സും ഉള്‍പ്പെടെ 37, വേദ കൃഷ്ണമൂര്‍ത്തി 22 പന്തില്‍ മൂന്നു വീതം ബൗണ്ടറിയും സിക്‌സും പായിച്ച് വേദ 37 റണ്‍സുമെടുത്തു ഇന്ത്യന്‍ നിരക്ക് കരുത്തേകി.
ആദ്യം ബാറ്റു ചെയ്ത ആതിഥേയര്‍ നിശ്ചിത 20 ഓവറില്‍ നാലു വിക്കറ്റ് നഷ്ടത്തില്‍ 164 റണ്‍സെടുത്തു. 38 റണ്‍സെടുത്ത ഡി വാന്‍ നീകേര്‍ക്കാണ് ആതിഥേയരുടെ ടോപ് സ്‌കോറര്‍. അവസാന ഓവറുകളില്‍ തകര്‍ത്തടിച്ച് ഏഴു പന്തില്‍ നാലു സിക്‌സും രണ്ടു ബൗണ്ടറിയും ഉള്‍പ്പെടെ 32 റണ്‍സെടുത്ത് പുറത്താകാതെ നിന്ന ട്രിയോണിന്റെ ഇന്നിങ്‌സും ദക്ഷിണാഫ്രിക്കന്‍ ഇന്നിങ്‌സില്‍ ശ്രദ്ധേയമായി. ഇന്ത്യയ്ക്കായി അനൂജ പട്ടേല്‍ രണ്ടു വിക്കറ്റ് വീഴ്ത്തി.