കോഴിക്കോട്: കോഴിക്കോട്ട് നായ കടിച്ച് ചികിത്സയിലായിരുന്ന വീട്ടമ്മ വാക്‌സിന്‍ എടുത്തിട്ടും മരിച്ചു. പേരാമ്പ്രയില്‍ കൂത്താളി പുതിയേടത്ത് ചന്ദ്രിക(53)യാണ് മരിച്ചത്. പേ വിഷബാധക്കെതിരെ വാക്‌സിന്‍ എടുത്തിട്ടും സംസ്ഥാനത്ത് ഇത് രണ്ടാം തവണയാണ് മരണം സംഭവിക്കുന്നത്. കഴിഞ്ഞ മാസം 21നാണ് വീടിനു സമീപത്തെ വയലില്‍ നിന്ന് ചന്ദ്രികക്ക് നായയുടെ കടിയേറ്റത്. ഒപ്പമുണ്ടായിരുന്ന എട്ടോളം പേര്‍ക്കും അന്ന് നായയുടെ കടിയേറ്റിരുന്നു.
പേരാമ്പ്ര താലൂക്ക് ആശുപത്രിയില്‍ വെച്ചാണ് ചന്ദ്രിക ആദ്യ വാക്‌സിനെടുത്തത്. രണ്ടാമത്തെ വാക്‌സിന്‍ കോഴിക്കോട് മെഡിക്കല്‍ കോളജ് ആശുപത്രിയില്‍ നിന്നുമാണ് എടുത്തത്. രണ്ടാം വാക്‌സിനു ശേഷം വീട്ടിലെത്തിയ ഇവര്‍ക്ക് പനിയും ജലദോഷവും തലവേദനയും അനുഭവപ്പെട്ടതോടെ പേരാമ്പ്ര ഇഎംഎസ് സഹകരണ ആശുപത്രിയില്‍ പ്രവേശിപ്പിച്ചെങ്കിലും സ്ഥിതി വഷളായതിനെത്തുടര്‍ന്ന് മെഡിക്കല്‍ കോളജ് ആശുപത്രിയിലേക്ക് മാറ്റി. അതേസമയം, മരണകാരണം സ്ഥിരീകരിക്കാന്‍ പരിശോധനാഫലം വരുന്നതുവരെ കാത്തിരിക്കണമെന്ന് കോഴിക്കോട് ഡിഎംഒ പറഞ്ഞു.