മുംബൈ:അടുത്ത വര്‍ഷം ഇന്ത്യ ആതിഥേയത്വം വഹിക്കുന്ന ഏകദിന ലോകകപ്പില്‍ കരുത്തരായ ദക്ഷിണാഫ്രിക്ക ഇല്ലെങ്കിലും അല്‍ഭുതപ്പെടാനില്ല. ഐ.സി.സി റാങ്കിംഗില്‍ പിന്നോക്കം നില്‍ക്കുന്ന ദക്ഷിണാഫ്രിക്കക്ക് നേരിട്ട് യോഗ്യത നേടാന്‍ കഴിയാത്ത സാഹചര്യമാണ് നിലവില്‍.
അടുത്ത വര്‍ഷം തുടക്കത്തില്‍ പ്ലാന്‍ ചെയ്ത ഓസ്‌ട്രേലിയക്കെതിരായ പരമ്പരയില്‍ നിന്നും അവര്‍ പിന്മാറിയതും സീസണില്‍ ഇനി നടക്കാനിരിക്കുന്ന ഏകദിന പരമ്പരകള്‍ ഇന്ത്യ, ഇംഗ്ലണ്ട് എന്നീ കരുത്തര്‍ക്കെതിരെയാണെന്നതുമാണ് ദക്ഷിണാഫ്രിക്കന്‍ ടീമിന് തലവേദന. സീസണില്‍ ഇനി നടക്കാനിരിക്കുന്ന പരമ്പരകള്‍ വലിയ വെല്ലുവിളിയാണെന്നിരിക്കെ ഈ പരമ്പരകള്‍ സ്വന്തമാക്കാനായാല്‍ റാങ്കിംഗില്‍ മുന്നേറാനും അത് വഴി നേരിട്ട് ലോകകപ്പിന് യോഗ്യത നേടാനുമാവും. ദക്ഷിണാഫ്രിക്കന്‍ ക്രിക്കറ്റ് ബോര്‍ഡ് പ്രഖ്യാപിച്ച ടി-20 ലീഗ് അടുത്ത വര്‍ഷമാദ്യമാണ്. ഇത് കാരണമാണ് ഓസ്‌ട്രേലിയന്‍ പരമ്പരയില്‍ നിന്നും ദക്ഷിണാഫ്രിക്ക പിന്മാറിയത്.