രാഹുല്‍ഗാന്ധിയുടെ വിവാഹം എന്ന് നടക്കുമെന്ന് സ്ത്രീകള്‍, നിങ്ങള്‍ തന്നെ പെണ്‍കുട്ടിയെ കണ്ടെത്തി തരൂ എന്ന് സോണിയ ഗാന്ധി. ഹരിയാനയിലെ കര്‍ഷകര്‍ക്ക് വേണ്ടി സോണിയ ഗാന്ധി ഡല്‍ഹിയില്‍ ഒരുക്കിയ വിരുന്നിനിടയാണ് രാഹുലിന്റെ വിവാഹ കാര്യം ചര്‍ച്ചയായത്. സേനാപതിയിലെ വനിതാ കര്‍ഷകരെ വീട്ടിലേക്ക് ക്ഷണിച്ച് വിരുന്നു നല്‍കുമെന്ന് രാഹുല്‍ഗാന്ധി നേരത്തെ വാഗ്ദാനം നല്‍കിയിരുന്നു. ഇതേ തുടര്‍ന്നാണ് ഒരു സംഘം സ്ത്രീകള്‍ ഡല്‍ഹിയില്‍ എത്തിയത്.
രാഹുലിനെ എന്ന് വിവാഹം കഴിപ്പിക്കും എന്നായിരുന്നു ഒരു സ്ത്രീ സോണിയ ഗാന്ധിയോട് പറഞ്ഞത്. എന്നാല്‍ ഒരു പെണ്‍കുട്ടിയെ നിങ്ങള്‍ തന്നെ കണ്ടെത്തി പറയൂ എന്നായിരുന്നു സോണിയ ഗാന്ധിയുടെ മറുപടി. കര്‍ഷകര്‍ക്കൊപ്പം ഇരുന്ന് രാഹുലും സോണിയയും പ്രിയങ്കയും ചേര്‍ന്ന് ഭക്ഷണം കഴിച്ചു. എല്ലാവര്‍ക്കും ഭക്ഷണം ഇഷ്ടമായോ എന്ന് രാഹുല്‍ ചോദിക്കുകയും ചെയ്യുന്നുണ്ട്.
ജൂലൈ എട്ടിന് ഹരിയാനയിലൂടെ കടന്നു പോകുമ്പോള്‍ രാഹുല്‍ ഗാന്ധി അല്പസമയം കര്‍ഷകര്‍ക്കൊപ്പം ചെലവഴിച്ചിരുന്നു. അന്നേദിവസം അദ്ദേഹം അവരെ ഡല്‍ഹി കാണാന്‍ കൊണ്ടുപോകുമെന്ന് പറഞ്ഞിരുന്നു. ഇതിനെ തുടര്‍ന്നാണ് ഇങ്ങനെ ഒരു അവസരം ഉണ്ടാക്കി കൊടുത്തത്.