മിര്‍പ്പൂര്‍: രാജ്യത്തിനായി ആദ്യ മല്‍സരത്തില്‍ തന്നെ വിക്കറ്റ് നേടാനായതിലെ സന്തോഷം പങ്ക് വെച്ച് ഇന്ത്യന്‍ താരം മിന്നു മണി. ബംഗ്ലാദേശിനെതിരായ ടി-20 പരമ്പരയിലെ ആദ്യ മല്‍സരത്തില്‍ ആദ്യ ഇലവനില്‍ തന്നെ അവസരം പ്രതീക്ഷിച്ചിരുന്നില്ല. പക്ഷേ മല്‍സര ദിവസം രാവിലെയാണ് നായിക ഹര്‍മന്‍പ്രീത് ആദ്യ ഇലവനിലുള്ള കാര്യം അറിയിച്ചത്. വലിയ സന്തോഷമായി ആ തീരുമാനം. അനുഭവസമ്പന്നരായ താരങ്ങള്‍ക്കൊപ്പം രാജ്യത്തിനായി കളിക്കുക എന്നത് വലിയ മോഹമായിരുന്നു. അത് സാധ്യമായി. അഞ്ചാമത്് ഓവറാണ് പന്ത് കിട്ടിയത്. രണ്ടാം പന്തില്‍ സിക്‌സറും മൂന്നാം പന്തില്‍ ബൗണ്ടറിയും പിറന്നപ്പോള്‍ സമ്മര്‍ദ്ദമുണ്ടായിരുന്നു. പക്ഷേ അടുത്ത പന്തില്‍ വിക്കറ്റ് നേടാനായതോടെ ആത്മവിശ്വാസമായി. തന്റെ വിക്കറ്റും ടീമിന്റെ വിജയവും വളരെ സന്തോഷം നല്‍കുന്നു.
ഇന്നാണ് രണ്ടാം മല്‍സരം. ഇന്നും മിന്നു മണിക്ക് ആദ്യ ഇലവനില്‍ സ്ഥാനമുറപ്പാണ്. ഇന്നത്തെ മല്‍സരത്തില്‍ വിജയം സ്വന്തമാക്കാനായാല്‍ പരമ്പരയും നേടാം. മിന്നു മണിയുടെ മികവിനെ നായിക ഹര്‍മന്‍പ്രീതും പ്രശംസിച്ചു. കന്നി മല്‍സരത്തിലെ സമ്മര്‍ദ്ദമൊന്നും പ്രകടിപ്പിക്കാതെയാണ് മിന്നു കളിച്ചതെന്ന് ഹര്‍മന്‍ പറഞ്ഞു. ഉച്ചത്തിരിഞ്ഞ് 1-30 മുതലാണ് മല്‍സരം. തല്‍സമയം സ്റ്റാര്‍ സ്‌പോര്‍ട്‌സില്‍.