മൂന്നാര്‍ ഇടമലക്കുടിയില്‍ കാട്ടാനയെ കണ്ട് ഓടുന്നതിനിടയില്‍ വീണ് പരിക്കേറ്റ ആദിവാസി യുവതി മരിച്ചു. ഷെഡുകുടി സ്വദേശി അസ് മോഹനന്റെ ഭാര്യ അംബികയാണ് (36) മരിച്ചത്. പരിക്കേറ്റതിനെ തുടര്‍ന്ന് കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെയാണ് കഴിഞ്ഞ ദിവസം മരിച്ചത്. ഗര്‍ഭിണിയായിരുന്ന യുവതി രണ്ടാഴ്ച മുമ്പാണ് കാട്ടാനയുടെ ആക്രമണത്തില്‍ നിന്ന് രക്ഷനേടുന്നതിന് വേണ്ടി ഓടുന്നതിനിടെ വീണ് പരിക്കേറ്റത്.
രാവിലെ കുളിക്കാന്‍ വേണ്ടി പോയ അംബികയെ പുഴയോരത്ത് ബോധരഹിതയായി കിടക്കുന്ന നിലയിലാണ് കണ്ടെത്തിയത്. യുവതിയെ ജീപ്പില്‍ പെട്ടിമുടിയിലെത്തിച്ച ശേഷം ആംബുലന്‍സില്‍ വൈകീട്ട് 7 മണിയോടെ മൂന്നാറിലെ ടാറ്റ ടീ ആശുപത്രിയിലെത്തിക്കുകയായിരുന്നു. ആരോഗ്യനില ഗുരുതരമായതിനെ തുടര്‍ന്ന് രാത്രി തന്നെ കോട്ടയം മെഡിക്കല്‍ കോളേജ് ആശുപത്രിയിലെത്തിച്ച് ചികിത്സ നല്‍കിയിരുന്നു.