ഇടുക്കി: മുല്ലപ്പെരിയാര്‍ അണക്കെട്ടില്‍ ജലനിരപ്പ് 141.05 ലേക്ക് ഉയര്‍ന്നു. കഴിഞ്ഞ കുറച്ചു ദിവസങ്ങളായി അണക്കെട്ടിലെ ജലനിരപ്പ് സ്ഥായിയായി നില്‍ക്കുകയായിരുന്നു. ഇന്നാണ് 141.05 അടി ആയി ഉയര്‍ന്നത്. അണക്കെട്ടിന്റെ പരമാവധി സംഭരണശേഷി 142 അടിയാണ്. 141 അടിയില്‍ എത്തിയപ്പോള്‍ തമിഴ്‌നാട് കേരളത്തിന് രണ്ടാംഘട്ട മുന്നറിയിപ്പ് നല്‍കി.
ഇടുക്കി ജില്ലയില്‍ കാര്യമായ മഴയില്ലെങ്കിലും മുല്ലപ്പെരിയാറിന്റെ വൃഷ്ടിപ്രദേശ മേഖലകളില്‍ ശക്തമായ മഴയാണ് ലഭിക്കുന്നത്. ഇതാണ് അണക്കെട്ടിലേക്കുള്ള നീരൊഴുക്ക് വര്‍ധിപ്പിക്കാന്‍ കാരണം. ഇനിയും മഴ ശക്തമായി തുടരുകയാണെങ്കില്‍ അണക്കെട്ടിന്റെ സ്പില്‍വേ ഷട്ടറുകള്‍ തുറന്ന് ജലം പുറത്തേക്ക് ഒഴുക്കി വിടും എന്നാണ് തമിഴ്‌നാട് കേരളത്തിന് മുന്നറിയിപ്പ് നല്‍കിയിരിക്കുന്നത്.