വൈക്കം: ജോലിഭാരം താങ്ങാന്‍ കഴിയില്ലെന്നും സ്ഥാനക്കയറ്റം റദ്ദ് ചെയ്യണമെന്നും ആവശ്യപ്പെട്ട് വിദ്യാഭ്യാസ മന്ത്രിക്ക് നല്‍കിയ അപേക്ഷ നിരസിച്ചതില്‍ മനംനൊന്ത് പ്രധാനാധ്യാപിക ജീവനൊടുക്കി. വൈക്കം പോളശ്ശേരി ഗവണ്‍മെന്റ് എല്‍പി സ്‌കൂളിലെ പ്രഥമാധ്യാപിക മാളിയേക്കല്‍ പുത്തന്‍ തറ ശ്രീജയെ(48) വെള്ളിയാഴ്ച സന്ധ്യയ്ക്ക് വീടിനുള്ളില്‍ തൂങ്ങിമരിച്ച നിലയിലാണ് കണ്ടെത്തിയത്. ജോലിഭാരം മൂലം ഉണ്ടായ മാനസിക സമ്മര്‍ദ്ദം ആണ് ജീവനൊടുക്കാന്‍ കാരണം എന്ന് ബന്ധുക്കള്‍ പറഞ്ഞു.ഭര്‍ത്താവ് രമേശ് കുമാര്‍ വൈക്കം മുന്‍സിഫ് കോടതി ജോലിക്കാരനാണ്.
വൈക്കം ഗവണ്‍മെന്റ് ഗേള്‍സ് ഹൈസ്‌കൂളില്‍ അധ്യാപികയായിരുന്ന ശ്രീജയ്ക്ക് ജൂണ്‍ ഒന്നിനാണ് കീഴൂര്‍ ജി എല്‍ പി എസില്‍ പ്രധാന അധ്യാപികയായി സ്ഥാനക്കയറ്റം ലഭിച്ചത്. പിറ്റേന്ന് ജോലിയില്‍ പ്രവേശിച്ചെങ്കിലും കൂടുതല്‍ ഉത്തരവാദിത്വമുള്ള ജോലിയുടെ സമ്മര്‍ദ്ദം താങ്ങാന്‍ കഴിയാത്തതില്‍ അവധിയില്‍ പ്രവേശിച്ചിരുന്നു. ഭര്‍ത്താവ് രോഗിയാണെന്നുള്ള കാരണം ചൂണ്ടിക്കാട്ടി സ്ഥാനം റദ്ദാക്കണമെന്ന് ആവശ്യപ്പെട്ട് ജൂലൈ ഏഴിന് ശ്രീജ വിദ്യാഭ്യാസ മന്ത്രിക്ക് അപേക്ഷ നല്‍കിയിരുന്നു. വൈക്കം മേഖലയില്‍ മുന്‍പ് ജോലി ചെയ്തിരുന്ന സ്‌കൂളില്‍ അധ്യാപികയായി തന്നെ നിയമിക്കണം എന്നായിരുന്നു അപേക്ഷ.
അപേക്ഷ പരിഗണിക്കാന്‍ ചട്ടങ്ങളില്‍ വ്യവസ്ഥയില്ലെന്ന് കുറവിലങ്ങാട് ഉപജില്ലാ വിദ്യാഭ്യാസ ഓഫീസര്‍ ശ്രീജക്ക് മറുപടി നല്‍കി.ഓഗസ്റ്റ് നാലിനാണ് ശ്രീജയ്ക്ക് വൈക്കം പോളശ്ശേരി എല്‍പിഎസിലേക്ക് സ്ഥലംമാറ്റം ലഭിച്ചത്.
സംഭവത്തില്‍ വൈക്കം പോലീസ് അസ്വാഭാവിക മരണത്തിന് കേസെടുത്തു.