മഞ്ചേരി : മഞ്ചേരിയില്‍ നടക്കുന്ന സൂപ്പര്‍ കപ്പ് പോരാട്ടത്തില്‍ ഇന്ന് രണ്ട് കളികള്‍ നടക്കും. വൈകീട്ട് അഞ്ചിന് നടക്കുന്ന ആദ്യ മത്സരത്തില്‍ കരുത്തരായ ചെന്നൈ എഫ്.സി ഐ ലീഗിലെ പൂര്‍വ്വകാല പ്രതാപികളായ ചര്‍ച്ചില്‍ ബ്രദേഴ്സിനെ നേരിടും. കഴിഞ്ഞ മത്സരത്തില്‍ നോര്‍ത്ത് ഈസ്റ്റ് യുണൈറ്റഡിനെ ഏകപക്ഷീയമായ മൂന്ന് ഗോളുകള്‍ക്ക് തകര്‍ത്ത ആത്മവിശ്വാസത്തിലാണ് ചെന്നൈ കളിക്കാനിറങ്ങുന്നത്. എന്നാല്‍ മുംബൈ സിറ്റിയുമായുളള കഴിഞ്ഞ കളിയില്‍ ഇഞ്ച്വറി ടൈമില്‍ ഗോള്‍ വഴങ്ങി നിര്‍ഭാഗ്യത്തോടെ കളം വിട്ട ചര്‍ച്ചിലിന് ഇന്ന് ജയം അനിവാര്യമാണ്.
രാത്രി എട്ടരക്ക് നടക്കുന്ന രണ്ടാമത്തെ മത്സരത്തില്‍ കരുത്തരായ മുംബൈ സിറ്റി നോര്‍ത്ത് ഈസ്റ്റ് യുണൈറ്റഡിനെ നേരിടും. കഴിഞ്ഞ കളിയില്‍ വിജയിച്ച മുംബൈ ഇന്നത്തെ കളി കൂടി ജയിച്ച് സെമി സാധ്യതകള്‍ കൂടുതല്‍ ശക്തമാക്കാനായിരിക്കും ശ്രമിക്കുക. എന്നാല്‍ കഴിഞ്ഞ കളിയില്‍ മൂന്ന് ഗോളുകള്‍ക്ക് പരാജയപ്പെട്ട നോര്‍ത്ത് ഈസ്റ്റിന് ഇത് ജീവന്‍മരണ പോരാട്ടമായിരിക്കും.