സംസ്ഥാനത്തെ റേഷന്‍ കടകളില്‍ മിന്നല്‍ പരിശോധന നടത്തി വിജിലന്‍സ്. ഓപ്പറേഷന്‍ സുഭിക്ഷയുടെ ഭാഗമായിട്ടാണ് പരിശോധന നടത്തിയത്. സംസ്ഥാനത്തെ 64 റേഷന്‍ കടകളില്‍ പരിശോധന നടത്തി. ഇന്ന് രാവിലെ പതിനൊന്ന് മണിയോടെയാണ് പരിശോധന ആരംഭിച്ചത്.
റേഷന്‍ കാര്‍ഡ് ഉടമകള്‍ക്ക് അര്‍ഹതപ്പെട്ട അളവില്‍ ഭക്ഷ്യ സാധനങ്ങള്‍ ചില റേഷന്‍ കടകള്‍ നല്‍കുന്നില്ലെന്ന് വിജിലന്‍സിന് നേരത്തെ രഹസ്യ വിവരം ലഭിച്ചിരുന്നു.
ഇതിന്റെ ഭാഗമായാണ് ‘ഓപ്പറേഷന്‍ സുഭിക്ഷ’ എന്ന പേരില്‍ സംസ്ഥാനത്തെ റേഷന്‍ കടകളില്‍ പരിശോധന നടത്തിയത്.
തിരുവനന്തപുരം ജില്ലയില്‍ 10 റേഷന്‍ കടകളിലും, കോട്ടയം, എറണാകുളം ജില്ലകളില്‍ 6, പത്തനംതിട്ട, കൊല്ലം, കോഴിക്കോട് ജില്ലകളില്‍ 5, ഇടുക്കി, കണ്ണൂര്‍, തൃശൂര്‍, മലപ്പുറം ജില്ലകളില്‍ 4, ആലപ്പുഴ, പാലക്കാട്, വയനാട് ജില്ലകളില്‍ 3, കാസര്‍ഗോഡ് ജില്ലയില്‍ 2 റേഷന്‍ കടകളിലുമാണ് വിജിലന്‍സ് മിന്നല്‍ പരിശോധന നടത്തിയത്.