മുഖ്യമന്ത്രിയുടെ വാഹനവ്യൂഹത്തേയും സുരക്ഷയേയും ചോദ്യം ചെയ്ത് പ്രതിപക്ഷ നേതാവ് വി.ഡി സതീശന്‍. ആരെയും ഭയന്നല്ല രാഷ്ട്രീയ പ്രവര്‍ത്തനം നടത്തുന്നതെന്നും അദ്ദേഹം പറഞ്ഞു. ജനങ്ങളെ ഭയമാണെങ്കില്‍ വീട്ടിലിരിക്കണമെന്ന് പ്രതിപക്ഷനേതാവ് പറഞ്ഞതിന് ‘പഴയവിജയനാണെങ്കില്‍ മറുപടി പറയുമായിരുന്നുവെന്ന്’ മുഖ്യമന്ത്രി പറഞ്ഞു. ഇതിന് പ്രതികരിച്ചാണ് പഴയവിജയനേയും പുതിയ വിജയനെയും തങ്ങള്‍ക്ക് ഭയമില്ലെന്ന് വി.ഡി സതീശന്‍ വ്യക്തമാക്കി.
ഒന്നോ രണ്ടോ ആളുകളാണ് കരിങ്കൊടി കാണിക്കുന്നത് എന്നാണ് പരിഹസിക്കുന്നത്. പിന്നെ എന്തിനാണ് പുലര്‍ച്ചെ വീട്ടില്‍ ഉറങ്ങുന്ന യൂത്ത് കോണ്‍ഗ്രസ് പ്രവര്‍ത്തകരെ പോലും പൊലീസ് കസ്റ്റഡിയിലെടുക്കുന്നതെന്ന് അദ്ദേഹം ചോദിച്ചു. യൂത്ത് കോണ്‍ഗ്രസുകാരെ വ്യാപകമായി കരുതല്‍ തടങ്കലിലാക്കുകയാണ്. കരുതല്‍ തടങ്കലിനെതിരെ സി.പി.എം നേതാവായിരുന്ന എ.കെ.ജി പറഞ്ഞതെങ്കിലും വായിച്ചുനോക്കണമെന്നും പ്രതിപക്ഷനേതാവ് പറഞ്ഞു.