ന്യൂഡല്‍ഹി: ഇന്ത്യയും പാക്കിസ്ഥാനും തമ്മില്‍ യുദ്ധം ചെയ്യരുതെന്ന അഭിപ്രായവുമായി പാക്കിസ്ഥാന്‍ മുന്‍ ക്രിക്കറ്റ് ക്യാപ്റ്റന്‍ വസീം അക്രം.
ഹൃദയത്തിന്റെ ഭാഷയില്‍ നിങ്ങളോട് അഭ്യര്‍ത്ഥിക്കുകയാണിത്. ഇന്ത്യയോ പാക്കിസ്ഥാനോ നമ്മുടെ ശത്രുക്കളല്ലെന്ന് വസീം അക്രം പറഞ്ഞു. സൈനികരോടുള്ള അഭ്യര്‍ത്ഥനയായാണ് അദ്ദേഹത്തിന്റെ ട്വീറ്റ് പ്രത്യക്ഷപ്പെട്ടിരിക്കുന്നത്.
ഇന്ത്യയോ പാക്കിസ്ഥാനോ നമ്മുടെ ശത്രുക്കളല്ല. നിങ്ങളുടെ ശത്രു ഞങ്ങളുടേയും ശത്രുക്കളാണ്. നമ്മള്‍ ഒരേ പ്രശ്‌നത്തെ അഭിമുഖീകരിക്കുന്നവരാണെന്ന് മനസിലാക്കാന്‍ ഇനിയും എത്രമാത്രം രക്തം ചിന്തേണ്ടി വരും. രാജ്യത്തുനിന്നും തീവ്രവാദത്തെ ഇല്ലായ്മ ചെയ്യാന്‍ നമ്മുടെ സഹോദരങ്ങള്‍ സൈന്യത്തില്‍ അവശേഷിക്കണമെന്നും വസീം അക്രം ട്വീറ്റില്‍ കുറിച്ചു.
അതേസമയം, അതിര്‍ത്തിയില്‍ വീണ്ടും പാക് പ്രകോപനം തുടരുകയാണ്. കാശ്മീരിലെ പൂഞ്ചില്‍ കൃഷ്ണഘട്ടി സെക്ടറിലെ ഇന്ത്യന്‍ സൈനിക പോസ്റ്റുകള്‍ക്ക് നേരെ പാക് സൈന്യം വെടിവെപ്പ് നടത്തി. രാവിലെ ആറ് മണിയോടെ ആരംഭിച്ച വെടിവെപ്പ് ഒരു മണിക്കൂറോളം നീണ്ടുനിന്നു. തുടര്‍ന്ന് ഇന്ത്യന്‍ സൈന്യം ശക്തമായി തിരിച്ചടിച്ചു. എ.എന്‍.ഐ ആണ് റിപ്പോര്‍ട്ട് പുറത്ത് വിട്ടത്.
കഴിഞ്ഞ ദിവസവും പാകിസ്ഥാന്റെ ഭാഗത്തു നിന്ന് വലിയ രീതിയിലുള്ള പ്രകോപനം ഉണ്ടായിരുന്നു. പാകിസ്ഥാനിലെ ഭീകരകേന്ദ്രങ്ങള്‍ വ്യോമാക്രമണത്തില്‍ തകര്‍ത്തതിന് പിന്നാലെയാണ് പാക് സൈന്യം അതിര്‍ത്തിയില്‍ പ്രകോപനം തുടങ്ങിയത്. ഇന്ത്യന്‍ സൈനിക പോസ്റ്റുകള്‍ക്ക് നേരെ ബുധനാഴ്ച്ച രാവിലെയും വെടിവയ്പ്പ് നടത്തിയിരുന്നു. കൂടാതെ പാക് സൈന്യം ഷെല്ലാക്രമണവും നടത്തിയിരുന്നു.
സിയാല്‍കോട്ട് ഉള്‍പ്പെടയെുള്ള പ്രദേശങ്ങളില്‍ കൂടുതല്‍ സൈനിക വാഹനങ്ങളും യുദ്ധ ടാങ്കുകളും എത്തിച്ച് പാകിസ്ഥാന്‍ സന്നാഹങ്ങള്‍ കൂട്ടുന്നുണ്ടെന്നാണ് റിപ്പോര്‍ട്ട്. ഇത് നിരീക്ഷണ പറക്കലാണെന്നാണ് പാക് വിശദീകരണം. അതേസമയം, ഇന്ത്യയും അതീവ ജാഗ്രതയിലാണ്.