ന്യൂഡല്‍ഹി: തിഹാര്‍ ജയിലില്‍ പല്ല് വേദനക്ക് പോലും ചികിത്സ നല്‍കുന്നില്ലെന്ന് ആക്ടിവിസ്റ്റും ജെഎന്‍യു മുന്‍ വിദ്യാര്‍ഥിയുമായ ഉമര്‍ ഖാലിദ്. കോടതിയിലാണ് ഇക്കാര്യം പറഞ്ഞത്. കഴിഞ്ഞ മൂന്ന് ദിവസമായി ജയില്‍ സൂപ്രണ്ടുമാരോട് പരാതിപ്പെട്ടിട്ടും വൈദ്യസഹായം നല്‍കിയില്ലെന്നാണ് അദ്ദേഹം പറഞ്ഞത്.
ജവഹര്‍ലാല്‍ നെഹ്‌റു സര്‍വകലാശാലയിലെ മുന്‍ വിദ്യാര്‍ഥി നേതാവായ ഖാലിദിനെ ഡല്‍ഹി കലാപക്കേസില്‍ പ്രതിചേര്‍ത്ത് ജയിലില്‍ അടച്ചിരിക്കുകയാണ്. വൈദ്യസഹായം നല്‍കാനും രണ്ട് ദിവസത്തിനകം വിശദ റിപ്പോര്‍ട്ട് നല്‍കാനും മജിസ്‌ട്രേറ്റ് ദിനേശ് കുമാര്‍ ജയില്‍ ഉദ്യോഗസ്ഥരോട് നിര്‍ദ്ദേശിച്ചു. ദന്തഡോക്ടര്‍ ജയിലില്‍ ലഭ്യമല്ലെങ്കില്‍, ചികിത്സക്കായി പ്രതിയെ ജയിലിന് പുറത്ത് കൊണ്ടുപോകാമെന്നും കോടതി അറിയിച്ചു.
ബുധനാഴ്ച ജയില്‍ സന്ദര്‍ശിക്കാന്‍ നിശ്ചയിച്ചിരുന്ന ദന്തരോഗവിദഗ്ധന്‍ എത്തിയിട്ടില്ലെന്ന് ഖാലിദ് കോടതിയെ അറിയിച്ചു. തനിക്ക് വേദനയുണ്ടെന്നും ഡോക്ടറുടെ സന്ദര്‍ശനത്തിനായി ഒരാഴ്ച കാത്തിരിക്കാന്‍ ബുദ്ധിമുട്ടാണെന്നും അദ്ദേഹം പറഞ്ഞു.