മുല്ലപ്പെരിയാര്‍ അണക്കെട്ട് വീണ്ടും മുന്നറിയിപ്പില്ലാതെ രാത്രിയില്‍ തുറന്നുവിട്ടതിനെതിരെ യുഡിഎഫ് എംപിമാരുടെ പ്രതിഷേധം. പാര്‍ലമെന്റിലേക്ക് എംപിമാര്‍ പ്രതിഷേധ പ്രകടനം നടത്തും. 10 മിനിറ്റ് മുമ്പ് ഇ മെയില്‍ അയച്ച ശേഷം ഡാം തുറന്നുവിടുകയാണെന്ന് ഇടുക്കി എംപി ഡീന്‍ കുര്യാക്കോസ് പറഞ്ഞു.
മനുഷ്യത്വവിരുദ്ധമായാണ് തമിഴ്‌നാട് പെരുമാറുന്നതെന്നും മുഖ്യമന്ത്രിയുടെ മൗനമാണ് എല്ലാ പ്രശ്‌നത്തിനും കാരണമെന്നും അദ്ദേഹം പറഞ്ഞു.സൈന്യാധിപന്‍ യുദ്ധമുഖത്ത് കാലുമാറുന്ന പോലെയാണ് മുഖ്യമന്ത്രിയുടെ നടപടി. മുഖ്യമന്ത്രിക്ക് ഗൗരവമില്ലാത്തതിനാലാണ് തമിഴ്‌നാട് ഇങ്ങനെ പെരുമാറുന്നതെന്നും ഡീന്‍ കുര്യാക്കോസ് കുറ്റപ്പെടുത്തി. മുഖ്യമന്ത്രി ഉടന്‍ ഡല്‍ഹിയിലെത്തി പ്രധാനമന്ത്രിയെ കാണണമെന്നും ഡീന്‍ പറഞ്ഞു.