ചെന്നൈ: തമിഴ്‌നാട് മുഖ്യമന്ത്രി എം.കെ സ്റ്റാലിന്റെ മകനും നടനുമായ ഉദയനിധി സ്റ്റാലിനും മന്ത്രിസഭയിലേക്ക്. ബുധനാഴ്ച അദ്ദേഹം സത്യപ്രതിജ്ഞ ചെയ്യും. നാളെ രാവിലെ 9 30ക്ക് രാജ്ഭവനിലാണ് സത്യപ്രതിജ്ഞ. ചില മന്ത്രിമാരുടെ വകുപ്പുകളിലും മാറ്റമുണ്ടായേക്കും.
നിലവില്‍ ചെപ്പോക്കില്‍നിന്നുള്ള എം.എല്‍.എയാണ് ഉദയനിധി. കായികം, യുവജനക്ഷേമം എന്നീ വകുപ്പുകള്‍ അദ്ദേഹത്തിന് നല്‍കിയേക്കുമെന്നാണ് സൂചന. മുഖ്യമന്ത്രി നേരിട്ട് മേല്‍നോട്ടം വഹിച്ചിരുന്ന പ്രത്യേക പദ്ധതികളുടെ നിര്‍വഹണ ചുമതലയും ഉദയനിധിക്കായിരിക്കുമെന്നും റിപ്പോര്‍ട്ടുണ്ട്.
അതേസമയം മന്ത്രിസഭാ പ്രവേശനം സംബന്ധിച്ച് മാധ്യമങ്ങളോട് പ്രതികരിക്കാന്‍ അദ്ദേഹം തയ്യാറായിട്ടില്ല. ചെന്നൈ നഗരത്തില്‍ മാന്‍ഡോസ് ചുഴലിക്കാറ്റ് ദുരിതം വിതച്ച മേഖലയില്‍ ഞായറാഴ്ച ഉദയനിധി സന്ദര്‍ശനം നടത്തിയിരുന്നു. ഈ സമയത്ത് മാധ്യമപ്രവര്‍ത്തകര്‍ മന്ത്രിസഭാ പ്രവേശനത്തെക്കുറിച്ച് ചോദിച്ചപ്പോള്‍ ആരു പറഞ്ഞന്നായിരുന്നു ഉദയനിധിയുടെ മറുചോദ്യം. ആവര്‍ത്തിച്ചു ചോദിച്ചപ്പോള്‍ എല്ലാകാര്യങ്ങളും മുഖ്യമന്ത്രി തീരുമാനിക്കുമെന്നു പറഞ്ഞൊഴിഞ്ഞു. എം.കെ.സ്റ്റാലിന്റെ നേതൃത്വത്തില്‍ ഡിഎംകെ സര്‍ക്കാര്‍ അധികാരമേറ്റതു മുതല്‍ പാര്‍ട്ടിയിലെ ഒരുവിഭാഗം ഉദയനിധിയെ മന്ത്രിസഭയിലേക്കു കൊണ്ടുവരണമെന്നു പാര്‍ട്ടി വേദികളില്‍ ആവശ്യമുയര്‍ത്തിയിരുന്നു.