കേരള പൊലീസിന്റെ സാരോപദേശം വന്ന് മണിക്കൂറുകള്‍ക്കകം അതേ സേനയുടെ ജീപ്പിടിച്ച് രണ്ട് യുവാക്കള്‍ മരിച്ചു. ആലപ്പുഴ തലവടിയില്‍ പൊലീസ് ജീപ്പിടിച്ചാണ് രണ്ട് യുവാക്കള്‍ മരിച്ചത്. കോട്ടയം സ്വദേശി ജസ്റ്റിന്‍,കുമരകം സ്വദേശി അലക്‌സ് എന്നിവരാണ് മരിച്ചത്.
ആലപ്പുഴ തണ്ണീര്‍മുക്കം റോഡില്‍ വെച്ച് പുലര്‍ച്ചെ മൂന്നരയോടെയാണ് അപകടം. ആലപ്പുഴ ഡിസിആര്‍ബി ഡിവൈഎസ്പിയുടെ ജീപ്പാണ് ഇടിച്ചത്. ജീപ്പില്‍ പൊലീസ് ഡ്രൈവര്‍ മാത്രമാണ് ഉണ്ടായിരുന്നത്. ആലപ്പുഴ ബീച്ചില്‍ പുതുവത്സരാഘോഷം കഴിഞ്ഞ് മടങ്ങിയവരാണ് അപകടത്തില്‍പ്പെട്ടത്.
അതിരു കടക്കുന്ന ആഘോഷങ്ങള്‍ അപകടകരമാണ് .സൂക്ഷിക്കുക എന്ന് കഴിഞ്ഞ ദിവസം കേരള പോലീസ് ജനങ്ങള്‍ക്ക് സാരോപദേശം നല്‍കിയിരുന്നു. സ്വന്തം സേനാംഗങ്ങളോടാണോ പൊലീസ് സൈബര്‍ സെല്‍ ഈ ഉപദേശം നല്‍കിയത് എന്നാണ് ജനം ചോദിക്കുന്നത്.