ചെന്നൈ പുഴലിനടുത്ത് കാവക്കരൈയില്‍ വീട്ടിലെ സെപ്റ്റിക് ടാങ്ക് വൃത്തിയാക്കുന്നതിനിടെ രണ്ട് തൊഴിലാളികള്‍ ശ്വാസം മുട്ടി മരിച്ചു. തിങ്കളാഴ്ചയാണ് സംഭവം. ഭാസ്‌കരന്‍ (53), ഇസ്മായില്‍ (37) എന്നിവരാണ് മരിച്ചത്. സംഭവത്തില്‍ വീട്ടുടമ നിര്‍മലയെ പൊലീസ് കസ്റ്റഡിലയിലെടുത്തിട്ടുണ്ട്. എന്നാല്‍ സംഭവത്തില്‍ ഇതുവരെ തോട്ടിപ്പണി നിരോധന നിയമ പ്രകാരം കേസ് രജിസ്റ്റര്‍ ചെയ്തിട്ടില്ല. സി.ആര്‍.പി.സി പ്രകാരം കേസ് കേസെടുത്താണ് അന്വേഷണം നടക്കുന്നത്.
മനുഷ്യരെ കൊണ്ട് തോട്ടിപ്പണി ചെയ്യിക്കുന്നത് നിരോധിച്ചിട്ടും വീട്ടുടമ രണ്ട് തൊഴിലാളികളെ സെപ്റ്റിക് ടാങ്ക് വൃത്തിയാക്കാന്‍ ഏല്‍പ്പിക്കുകയായിരുന്നു.
രണ്ട് പേരും ടാങ്കിലിറങ്ങിയെങ്കിലും പുറത്തേക്ക് വന്നില്ല. തുടര്‍ന്ന് നിര്‍മല പൊലീസിനെ അറിയിക്കുകയായിരുന്നു. പുഴല്‍ പൊലീസ് സ്ഥലത്തെത്തി അഗ്നി ശമന സേനാംഗങ്ങളുടെ സഹായത്തോടെ ഇരുവരുടെയും മൃതദേഹം പുറത്തെടുത്തു. മൃതദേഹങ്ങള്‍ സ്റ്റാന്‍ലി ഗവ. മെഡിക്കല്‍ കോളേജില്‍ പോസ്റ്റുമോര്‍ട്ടത്തിന് അയച്ചിരിക്കുകയാണ്.
സെപ്റ്റിക് ടാങ്കുകല്‍ വൃത്തിയാക്കുന്നതിനിടെ നിരവധി ആളുകള്‍ മരണപ്പെടുന്നത് രാജ്യത്ത് പതിവാണ്. ഇതോടെ മനുഷ്യരെ ഉപയോഗിച്ച് സെപ്റ്റിക് ടാങ്കുകള്‍ വൃത്തിയാക്കുന്നത് നിരോധിച്ചിരുന്നു.