തിരുവനന്തപുരത്ത് പൊലീസിനെതിരെ കഞ്ചാവ് മാഫിയയുടെ ആക്രമണം. ഇന്ന് പുലര്‍ച്ചെ മൂന്നു മണിയോടെ കുറ്റിച്ചല്‍ നെല്ലിക്കുന്നിലാണ് സംഭവം.
പ്രദേശത്ത് കഞ്ചാവ് മാഫിയ പ്രവര്‍ത്തിക്കുന്നതായി ലഭിച്ച വിവരത്തിന്റെ അടിസ്ഥാനത്തില്‍ അന്വേഷണത്തിന് എത്തിയ നെയ്യാര്‍ പൊലീസിന് നേരെ അക്രമികള്‍ ബോംബ് എറിഞ്ഞു. പൊലീസ് ജീപ്പ് പൂര്‍ണമായും അടിച്ചു തകര്‍ക്കുകയും ചെയ്തു. കല്ലും മറ്റ് ആയുധങ്ങളും ഉപയോഗിച്ചുള്ള ആക്രമണത്തില്‍ സിപിഒ ടിനോ ജോസഫിന് പരിക്കേറ്റു. അദ്ദേഹത്തെ ആശുപത്രിയിലേക്ക് മാറ്റി.
സ്ഥലത്ത് കൂടുതല്‍ പോലീസിനെ വിന്യസിച്ചിട്ടുണ്ട്. കൂടുതല്‍ പോലീസ് സംഘം പ്രദേശത്തേക്ക് പുറപ്പെട്ടിട്ടുണ്ട്. ആക്രമികള്‍ക്ക് വേണ്ടിയുള്ള തിരച്ചില്‍ ആരംഭിച്ചു. ഇവര്‍ വനത്തിനുള്ളിലാണെന്ന് നിഗമനത്തിലാണ് പോലീസ്. സംഭവത്തില്‍ സമീപത്തെ വീടുകള്‍ക്കും നാശനഷ്ടമുണ്ടായി.