ടിടിഇക്കു നേരെ വീണ്ടും ട്രെയിനിൽ യാത്രക്കാരന്റ ആക്രമണം. വെസ്റ്റ് കോസ്റ്റ് എക്സ്പ്രസിലെ യാത്രക്കാരനാണ് ടിടിഇയെ ആക്രമിച്ചത്. പുലർച്ചെ ട്രെയിൻ വടകര പിന്നിട്ടപ്പോളാണ് ആക്രമണം ഉണ്ടായത്.മദ്യ ലഹരിയിൽ ആയിരുന്ന അക്രമി കത്തി വീശിയതായി യാത്രക്കാർ പറഞ്ഞു.പരിക്കേറ്റ ടിടിഇ ഋഷി ശശീന്ദ്രനാഥ് ഷൊർണൂർ റെയിൽവേ ഹോസ്പിറ്റലിൽ ചികിത്സ തേടി.. പ്രതി ബിജുകുമാറിനെ റെയിൽവേ പൊലീസിന്റെ കസ്റ്റഡിയിലെടുത്തു.
നേരത്തെ മംഗളൂരു- ചെന്നൈ എ്കസ്പ്രസില്‍ വനിതാ ടിടിഇയെയും യാത്രക്കാരൻ മർദിച്ച സംഭവമുണ്ടായി. പാലക്കാട് സ്വദേശിനി രജിതയ്ക്കാണ് മർദനമേറ്റത്. വടകരയ്ക്കും കൊയിലാണ്ടിക്കും ഇടയില്‍ വച്ചാണ് ശനിയാഴ്ച രാവിലെ ഉദ്യോഗസ്ഥയ്ക്ക് നേരെ വയോധികനായ യാത്രക്കാരന്റെ ആക്രമണം ഉണ്ടായത്.ജനറല്‍ ടിക്കറ്റ് എടുത്ത റിസര്‍വേഷന്‍ കോച്ചിൽ യാത്ര ചെയ്ത ഇയാളെ റിസര്‍വ് ചെയ്ത യാത്രക്കാര്‍ എത്തിയപ്പോള്‍ ടിടിഇ സീറ്റില്‍ നിന്ന് മാറിയിരിക്കാന്‍ ആവശ്യപ്പെട്ടപ്പോൾ മുഖത്തടിക്കുകയായിരുന്നു.കൊയിലാണ്ടി സ്‌റ്റേഷനില്‍ നിന്ന് ജനറല്‍ കമ്പാട്ട്മെന്റിൽ മാറിക്കയറിയ വയോധികനെ യാത്രക്കാര്‍ പിടികൂടി റെയില്‍വേ പൊലീസിനെ ഏല്‍പ്പിച്ചു. മര്‍ദനത്തില്‍ പരിക്കേറ്റ യുവതി കോഴിക്കോട് ബീച്ചാശുപത്രിയില്‍ ചികിത്സ തേടി.