ന്യൂഡല്‍ഹി: പ്രധാനമന്ത്രി നരേന്ദ്ര മോദിക്കെതിരെ രാജ്യസഭയില്‍ അവകാശ ലംഘന നോട്ടീസ്. ടി.ആര്‍.എസ് (തെലങ്കാന രാഷ്ട്ര സമിതി) അംഗങ്ങളാണ് പ്രധാനമന്ത്രിക്കെതിരെ അവകാശ ലംഘനത്തിന് നോട്ടീസ് നല്‍കിയത്. രാഷ്ട്രപതിയുടെ പ്രസംഗത്തിനുള്ള നന്ദി പ്രമേയ ചര്‍ച്ചയ്ക്കുള്ള മറുപടിക്കിടെ പ്രധാനമന്ത്രി ആന്ധ്ര, തെലുങ്കാന രൂപീകരണത്തെ കുറിച്ച് നടത്തിയ പരാമര്‍ശത്തിലാണ് ടി.ആര്‍.എസ് അംഗങ്ങള്‍ നോട്ടീസ് നല്‍കിയത്. സ്പീക്കര്‍ പരിശോധിച്ച ശേഷമായിരിക്കും അവകാശ ലംഘന പ്രമേയം ഉള്‍പ്പെടെയുള്ള നടപടികളിലേക്ക് നീങ്ങുക. വിഷയത്തില്‍ സഭയുടെ നടുത്തളത്തില്‍ ഇറങ്ങി ടി.ആര്‍.എസ് എം.പിമാര്‍ പ്രതിഷേധിച്ചിരുന്നു. ശക്തമായ പ്രതിഷേധവുമായി മുന്നോട്ട് പോകുമെന്നും എം.പിമാര്‍ അറിയിച്ചു.