തിരുവനന്തപുരം: ‘ലിസി ഹോസ്പിറ്റലില്‍ രണ്ടുമണിക്കു ശേഷം ഒ.പി പ്രവര്‍ത്തനം ഉണ്ടായിരിക്കുന്നതാണ്’- തൃക്കാക്കരയില്‍ യു.ഡി.എഫ് സ്ഥാനാര്‍ത്ഥി ഉമാതോമസ് മുന്നേറ്റം തുടരുമ്പോള്‍ സാമൂഹ്യമാധ്യമങ്ങളില്‍ ട്രോളര്‍മാരും ‘ലീഡ്’ ചെയ്യുകയായിരുന്നു. ഇടതുസ്ഥാനാര്‍ത്ഥി ഡോ.ജോ ജോസഫിനെ കണക്കിന് പരിഹസിക്കുന്ന ട്രോളുകള്‍ കൊണ്ട് ഫേസ്ബുക്കും വാട്‌സാപ്പും അടക്കമുള്ള സോഷ്യല്‍ നെറ്റ്‌വര്‍ക്കുകള്‍ നിറഞ്ഞു.
”സ്ഥാനാര്‍ത്ഥിയായി തീരുമാനിച്ചപ്പോഴേ ഞങ്ങള്‍ പറഞ്ഞു, നിങ്ങളുടെ ഡോക്ടറെ ഞങ്ങള്‍ തിരിച്ചുതരുമെന്ന്. തൃക്കാക്കരക്കാര്‍ വാക്കുപാലിക്കുന്നവരാണ്, ഞങ്ങള്‍ കാരണം ആരും ഹാര്‍ട്ട് അറ്റാക്ക് വന്ന് മരിക്കാന്‍ ഇടാകരുത്” എന്നിങ്ങനെയുള്ള ട്രോളുകളാണ് ഏറെയും. ഫലം വന്നശേഷം ജോ ജോസഫിന്റെ പ്രതികരണത്തിന്റെ ചുവടുപിടിച്ചും ട്രോളുകളുണ്ടായി. തന്നെ ഏല്‍പിച്ച ജോലി താന്‍ കൃത്യമായി ചെയ്തു എന്ന അദ്ദേഹത്തിന്റെ വാക്കുകളോട് ചേര്‍ത്തുവെച്ച് സിനിമയിലെ ജഗദീഷിന്റെ കഥാപാത്രത്തെയാണ് ട്രോളിന് ഉപയോഗിച്ചത്. ”അതിന് ആ താക്കോല്‍ എന്റെ കയ്യില്‍ ഇല്ലല്ലോ” എന്ന പ്രശസ്തമായ കോമഡി സീനും ട്രോളര്‍മാര്‍ എല്‍.ഡി.എഫ് സ്ഥാനാര്‍ത്ഥിയുടെ തലയില്‍വെച്ചു.
പിണറായി മുതല്‍ പി.സി ജോര്‍ജ് വരെയുള്ളവരെയും ട്രോളര്‍മാര്‍ വെറുതേവിട്ടില്ല. ‘അറിഞ്ഞില്ലേ, ക്യാപ്റ്റന്‍ മാറി’ എന്ന ട്രോളില്‍ ക്യാപ്റ്റന്‍സി ഏറ്റെടുക്കുന്നത് പ്രതിപക്ഷ നേതാവ് വി.ഡി സതീശന്‍. ഗുണ്ടാത്തലവനെ പോലെ വേഷമിട്ട പി.സി ജോര്‍ജ്, വീട്ടില്‍ പോയിട്ട് ഒരുമാസമായെന്ന് പരിഭവിക്കുന്ന മന്ത്രി പി. രാജീവ് എന്നിങ്ങനെ ട്രോളര്‍മാരും വന്‍ ഭൂരിപക്ഷമാണ് നേടിയത്.