മേഘാലയയില്‍ മൂന്ന് ദിവസത്തെ സന്ദര്‍ശനത്തിനെത്തി ബംഗാള്‍ മുഖ്യമന്ത്രി മമത ബാനര്‍ജി. സംസ്ഥാനത്ത് ‘മിഷന്‍ മേഘാലയ’യ്ക്ക് തുടക്കം കുറിച്ചു. അടുത്ത വര്‍ഷം ആദ്യം നിയമസഭാ തിരഞ്ഞെടുപ്പ് നടക്കാനിരിക്കെയാണ് സന്ദര്‍ശനം. തൃണമൂല്‍ കോണ്‍ഗ്രസ് ദേശീയ സെക്രട്ടറി അഭിഷേഖ് ബാനര്‍ജിയ്‌ക്കൊപ്പമാണ് മമത ബാനര്‍ജി മേഘാലയയില്‍ എത്തിയത്.
മണ്ണിന്റെ മക്കളാണ് സംസ്ഥാനം ഭരിക്കുന്നതെന്നും മേഘാലയയിലെ ജനങ്ങളെ സഹായിക്കാന്‍ തന്റെ പാര്‍ട്ടി ആഗ്രഹിക്കുന്നുവെന്നും മമത ബാനര്‍ജി പറഞ്ഞു. പാര്‍ട്ടി പ്രവര്‍ത്തകരുടെ സമ്മേളനത്തെ അഭിസംബോധ ചെയ്ത് സംസാരിക്കുകയായിരുന്നു അവര്‍. കേന്ദ്രത്തിലെ ബിജെപി സര്‍ക്കാര്‍ മേഘാലയയെയും മറ്റ് വടക്കുകിഴക്കന്‍ സംസ്ഥാനങ്ങളെയും അവഗണിക്കുകയാണെന്ന് അവര്‍ ആരോപിച്ചു.
പുരോഗതിയുടെ പാതയില്‍ നമുക്ക് ഒരുമിച്ച് നടക്കാം. എന്തിനാണ് ജാതിയുടെയും മതത്തിന്റെയും അടിസ്ഥാനത്തില്‍ ജനങ്ങളെ ഭിന്നിപ്പിക്കുന്നതെന്നും മമത ബാനര്‍ജി ചോദിച്ചു. മേഘാലയയുടെ ഭൂമി ബിജെപി തട്ടിയെടുത്തെന്നും മമത ബാനര്‍ജി ആരോപിച്ചു.