തൃക്കാക്കര വ്യാജരേഖ കേസ് ഷാജന്‍ സ്കറിയക്ക് ജാമ്യം. എറണാകുളം ജില്ലാ കോടതിയാണ് ജാമ്യം അനുവദിച്ചത്. ചോദ്യം ചെയ്യലിന് ശേഷം ജാമ്യം നല്‍കി വിട്ടയക്കാന്‍ കോടതി ഉത്തരവിട്ടു. ഇന്ന് രാവിലെയാണ് നിലമ്പൂരില്‍ വച്ച് തൃക്കാക്കര പൊലീസ് ഷാജന്‍ സ്‌കറിയയെ അറസ്റ്റ് ചെയ്തത്. നിലവില്‍ കളമശേരി പൊലീസ് സ്റ്റേഷനിലെത്തിച്ച് ഷാജന്‍ സ്‌കറിയയെ ചോദ്യം ചെയ്യുകയാണ്.
ഷാജന്റെ മുന്‍കൂര്‍ ജാമ്യാപേക്ഷ കോടതി പരിഗണിക്കാനിരിക്കെയായിരുന്നു അറസ്റ്റ്. മുന്‍പ് നിലമ്പൂര്‍ നഗരസഭ സ്റ്റാന്‍ഡിങ് കമ്മിറ്റി ചെയര്‍മാന്‍ സ്‌കറിയയുടെ പരാതിയില്‍ ആയിരുന്നു ഷാജനെതിരെ ജാമ്യമില്ലാ വകുപ്പ് ചുമത്തി നിലമ്പൂര്‍ പൊലീസ് കേസെടുത്തത്.
ഷാജന്‍ സ്‌കറിയ പൊലീസിന്റെ വയര്‍ലെസ് സന്ദേശങ്ങള്‍ ചോര്‍ത്തിയെന്നാരോപിച്ച് പി.വി അന്‍വറും ഡി.ജി.പിക്ക് പരാതി നല്‍കിയിരുന്നു. രാജ്യസുരക്ഷയെ ബാധിക്കുന്ന വിഷയമാണെന്ന് ചൂണ്ടിക്കാട്ടി അന്‍വര്‍ പ്രധാനമന്ത്രിക്കും ഇമെയില്‍ വഴി പരാതി നല്‍കിയിരുന്നു.