പാലക്കാട്: ആശുപത്രിയിലേക്കുള്ള യാത്രാമധ്യേ ആദിവാസി യുവതി ജീപ്പില്‍ പ്രസവിച്ചു. കാഞ്ഞിരപ്പുഴ പാമ്പന്‍തോട് കോളനിയിലെ മഹേഷിന്റെ ഭാര്യ ദിവ്യയാണ് (24) വാഹനത്തില്‍ ആണ്‍കുഞ്ഞിന് ജന്മം നല്‍കിയത്. സ്‌കാനിംഗ് റിപ്പോര്‍ട്ട് പരിശോധിച്ച ഡോക്ടര്‍ അടുത്ത ബുധനാഴ്ച വരാനാണ് പറഞ്ഞത്.
ഇന്നലെ വൈകീട്ടാണ് പ്രസവവേദന അനുഭവപ്പെട്ടത്. ഉടന്‍ എസ്.ടി പ്രമോട്ടര്‍ എസ്. ശ്രീലാലിനെ വിവരമറിയിച്ചു. പ്രമോട്ടര്‍ ഇടപെട്ട് കോളനിയില്‍ നിന്ന് മണ്ണാര്‍ക്കാട് താലൂക്ക് ആശുപത്രിയിലെത്തിക്കാന്‍ ജീപ്പ് ഏര്‍പ്പാടാക്കി. കാഞ്ഞിരം സ്വദേശി ജീപ്പുമായി കോളനിയിലെത്തി രാത്രി 7 മണിക്ക് യുവതിയുമായി പുറപ്പെട്ടു. തെങ്കര വഴിയാണ് ഇവര്‍ മണ്ണാര്‍ക്കാട്ടേയ്ക്ക് വന്നത്. എന്നാല്‍, മണലടി പഴയ ചെക്‌പോസ്റ്റിന് സമീപത്ത് ഏഴരയോടെ പ്രസവം നടന്നു. ഉടന്‍ അമ്മയേയും കുഞ്ഞിനേയും താലക്ക് ആശുപത്രിയിലെത്തിച്ചു.