സിപിഐ പാര്‍ട്ടി ഓഫീസ് പരിസരത്ത് നിന്ന് തേക്ക് അടക്കമുള്ള മരങ്ങള്‍ അനുമതിയില്ലാതെ മുറിച്ച് കടത്തിയെന്ന് പരാതി. ബ്രാഞ്ച് സെക്രട്ടറിയുടെ നേതൃത്വത്തിലാണ് മരംമുറി നടന്നതെന്നാണ് ആരോപണം. സംഭവത്തില്‍ പ്രവര്‍ത്തകര്‍ വനംവകുപ്പിന് പരാതി നല്‍കി. എന്നാല്‍ പാര്‍ട്ടി യോഗം ചേര്‍ന്നാണ് മരം മുറിക്കാന്‍ തീരുമാനിച്ചതെന്നാണ് ബ്രാഞ്ച് സെക്രട്ടറിയുടെ വിശദീകരണം.
കിഴക്കഞ്ചേരി വാല്‍കുളമ്പിലെ സിപിഐ പാര്‍ട്ടി ഓഫീസ് പരിസരത്ത് നിന്നാണ് മരം മുറിച്ചത്. ആറ് തേക്ക് മരങ്ങളാണ് അനുമതിയില്ലാതെ മുറിച്ച് കടത്തിയത്. പ്രവര്‍ത്തകരുമായി ചര്‍ച്ച നടത്താതെയാണ് മരം മുറിക്കാന്‍ തീരുമാനിച്ചതെന്നും പരാതിയില്‍ പറയുന്നു.
എന്നാല്‍ പാര്‍ട്ടി യോഗം ചേര്‍ന്നാണ് മരം മുറിക്കാന്‍ തീരുമാനിച്ചതെന്നും മരം മുറിക്കാന്‍ തീരുമാനിച്ച യോഗത്തില്‍ പങ്കെടുക്കാത്തവരാണ് ആരോപണം ഉന്നയിക്കുന്നതെന്നും നേതൃത്വം പറഞ്ഞു. ജില്ലാ നേതൃത്വത്തിന്റെ അറിവോടെയാണ് മരം മുറിച്ചതെന്നാണ് ബ്രാഞ്ച് സെക്രട്ടറി വ്യക്തമാക്കുന്നത്.