ലെയ്ന്‍ ട്രാഫിക് നിയമലംഘത്തിന് ഇന്നുമുതല്‍ പിഴ ഈടാക്കുമെന്ന് ഗതാഗത കമ്മീഷ്ണര്‍ എസ്.ശ്രീജിത്ത് വ്യക്തമാക്കി. കഴിഞ്ഞ ദിവസം നടത്തിയ പരിശോധനയില്‍ ആയിരത്തിലേറെ ലംഘനങ്ങള്‍ കണ്ടതിനെ തുടര്‍ന്നാണ് നടപടി ശക്തമാക്കിയത്. റോഡ് സുരക്ഷാവാരാചരണവും ഇന്നു തുടങ്ങുന്നതിനാല്‍ മറ്റുള്ള ലംഘനങ്ങള്‍ക്കെതിരെയും കര്‍ശനമായ പരിശോധനയും നടപടിയും ഉണ്ടാകും. ‘ഹെല്‍മറ്റ് വയ്ക്കാത്തത് ഉള്‍പ്പെടെ ചെറിയ ലംഘനങ്ങളായാണ് ആളുകള്‍ കാണുന്നത്. എന്നാല്‍ 54 ശതമാനം മരണങ്ങള്‍ക്കും കാരണം ഹെല്‍മറ്റ് വയ്ക്കാത്തതാണ്. ലെയ്ന്‍ ട്രാഫിക് ലംഘനത്തിലൂടെ ഏകദേശം 37 ശതമാനം അപകടങ്ങള്‍ ഉണ്ടാകാറുണ്ട്. ചെറിയ ലംഘനങ്ങള്‍ തടയുന്നത് കര്‍ശനമായി നടപ്പാക്കാന്‍ ഈ വിവരം ഉപയോഗിക്കുകയാണെന്ന്.’-എസ്. ശ്രീജിത്ത് പറഞ്ഞു.
ലെയ്ന്‍ ട്രാഫിക് നിയമങ്ങള്‍ / നിര്‍ദേശങ്ങള്‍
1. നാലുവരി / ആറുവരിപ്പാതകളില്‍ വലിയ വാഹനങ്ങള്‍, ഭാരം കയറ്റിയ വാഹനങ്ങള്‍, വേഗം കുറഞ്ഞ വാഹനങ്ങള്‍ എന്നിവ റോഡിന്റെ ഇടതുവശം ചേര്‍ന്നു മാത്രമെ പോകാവൂ.
2. വലതുവശത്തെ ട്രാക്ക് നിശ്ചിത വേഗത്തില്‍ പോകുന്നവര്‍ക്കു മറ്റുവാഹനങ്ങളെ ഓവര്‍ടേക്ക് ചെയ്യാനും മാത്രം.
3. ലെയ്ന്‍ മാറുമ്പോള്‍ സിഗ്നലുകള്‍ ഉപയോഗിക്കുക.
4. റോഡിന്റെ വലതുവശത്തെ ലെയ്‌നില്‍ ഒരുകാരണവശാലും വാഹനം നിര്‍ത്തിയിടരുത്.
5. റോഡിന്റെ ഇടതുവശത്ത് അനധികൃത പാര്‍ക്കിങ് പാടില്ല.