മുംബൈ: ആദ്യ മല്‍സരത്തില്‍ തോല്‍വി പിണഞ്ഞ മുംബൈ ഇന്ത്യന്‍സും തട്ടുതകര്‍പ്പന്‍ പ്രകടനത്തിലുടെ ആദ്യ കളിയില്‍ വിജയം സ്വന്തമാക്കിയ രാജസ്ഥാന്‍ റോയല്‍സും ഇന്ത്യന്‍ പ്രീമിയര്‍ ലീഗ് ക്രിക്കറ്റില്‍ ഇന്ന് മുഖാമുഖം.
ഇന്ത്യന്‍ പോരാട്ടത്തേക്കാള്‍ ഇതൊരു ലങ്കന്‍ അങ്കമാണ്. രണ്ട് ടീമുകളുടെയും പരിശീലകര്‍ ലങ്കന്‍ ക്രിക്കറ്റിലെ ഇതിഹാസങ്ങളായ മഹേല ജയവര്‍ദ്ധനയും കുമാര്‍ സങ്കക്കാരയുമാണ്. രണ്ട് ടീമുകളെയും നയിക്കുന്നത് ഇന്ത്യന്‍ താരങ്ങളായ രോഹിത് ശര്‍മയും സഞ്ജു സാംസണും. രണ്ട് സംഘത്തിലും കളിയുടെ ഗതി തിരിച്ചുവിടാന്‍ പ്രാപ്തരായ വിന്‍ഡീസുകാരുണ്ട്- കിരണ്‍ പൊലാര്‍ഡും ഷിംറോണ്‍ ഹെത്തിമറും. രണ്ട് അശ്വിന്‍മാരുടെ സ്പിന്‍ പോരാട്ടവും ഇന്നുണ്ടാവും.
ഇന്ത്യന്‍ താരം ആര്‍. അശ്വിന്‍ രാജസ്ഥാന്‍ നിരയില്‍ കളിക്കുമ്പോള്‍ എം.അശ്വിന്‍ മുംബൈ സംഘത്തിലുണ്ട്. ഡല്‍ഹി ക്യാപിറ്റല്‍സിന് മുന്നിലായിരുന്നു ആദ്യ മല്‍സരത്തില്‍ മുംബൈ തകര്‍ന്നത്-അതും വിജയിക്കുമെന്ന ഘട്ടത്തില്‍ നിന്നുമുള്ള തോല്‍വി. സഞ്ജുവിന്റെ മികവിലായിരുന്നു വലിയ സ്‌ക്കോറുമായി രാജസ്ഥാന്‍ സണ്‍റൈസേഴ്‌സ് ഹൈദരാബാദിനെ തരിപ്പണമാക്കിയത്.