മാഡ്രിഡ്: സ്പാനിഷ് ലാലീഗ കിരീടം ഏറെക്കുറെ ബാര്‍സിലോണക്ക് അടിയറ വെച്ച റയല്‍ മാഡ്രിഡ് കിംഗ്സ് കപ്പ് സെമിയിലെ രണ്ടാം പാദത്തിലെങ്കിലും മാനം കാക്കുമോ…? ആദ്യ പാദത്തില്‍ ബാര്‍സിലോണക്ക് മുന്നില്‍ ഒരു ഗോളിന് തല താഴ്ത്തിയ കരീ ബെന്‍സേമയുടെ സംഘത്തിന് ഇന്ന് ഒന്നിലധികം ഗോളുകള്‍ക്ക്് ജയിക്കണം.
ബാര്‍സയുടെ തട്ടകമായ നുവോ കാമ്പിലാണ് മല്‍സരമെന്നതിനാല്‍ റയലിന് കാര്യങ്ങള്‍ എളുപ്പമാവില്ല. ലാലീഗ കിരീടത്തിന് അരികിലാണ് ബാര്‍സ. 12 പോയന്റുകള്‍ക്കാണ് സാവിയുടെ ബാര്‍സ മുന്നില്‍ നില്‍ക്കുന്നത്. അവസാന മല്‍സരത്തില്‍ എല്‍ഷേയെ നാല് ഗോളിന് തകര്‍ത്ത് ഗംഭീര ഫോമിലാണ് റോബര്‍ട്ടോ ലെവന്‍ഡോവിസ്‌ക്കിയുടെ ടീം. റയലും കഴിഞ്ഞ മല്‍സരത്തില്‍ വലഡോലിഡിനെതിരെ വന്‍ വിജയം നേടിയിരുന്നു. ബെന്‍സേമ ഹാട്രിക്ക് സ്വന്തമാക്കിയ അങ്കത്തില്‍ ആറ് ഗോളിനായിരുന്നു ടീമിന്റെ വിജയം. എല്‍ ക്ലാസിക്കോ മല്‍സരത്തിന് മുമ്പ് വന്‍ വിവാദത്തിലാണ് ബാര്‍സ. സ്പാനിഷ് റഫറീസ് കമ്മീഷന്‍ വൈസ് പ്രസിഡണ്ടിന് ബാര്‍സ കോടികള്‍ നല്‍കി എന്ന വിവാദത്തില്‍ ഇത് വരെ ക്ലബ് ഉത്തരം നല്‍കിയിട്ടില്ല. ലാലീഗ മാനേജ്മെന്റ്് ഇക്കാര്യത്തില്‍ പരസ്യമായി ബാര്‍സക്ക് എതിരെ സംസാരിക്കുന്നുമുണ്ട്.