കൊണ്ടോട്ടി: മാരക ലഹരി മരുന്ന് വിഭാഗത്തില്‍പ്പെട്ട എംഡിഎംഎയുമായി ലഹരികടത്തു സംഘത്തില്‍ ഉള്‍പ്പെട്ട ടിപ്പര്‍ ഡ്രൈവര്‍മാര്‍ പിടിയിലായി. കരിപ്പൂര്‍ കരുവാന്‍കല്ല് സ്വദേശികളായ കോട്ടേപ്പാറ വീട്ടില്‍ അബ്ദുള്‍ ലത്തീഫ് (35), ചൊക്ലി വീട്ടില്‍ നൗഷാദ് (25) എന്നിവരാണ് പിടിയിലായത്. ഇവരില്‍ നിന്നും 4.5 ഗ്രാം എംഡിഎംഎ പിടിച്ചെടുത്തു.
നെടിയിരുപ്പ് മില്ലുംപടിയില്‍ വച്ചാണ് ഇവര്‍ പിടിയിലായത്. കൊണ്ടോട്ടിയിലെ വിദ്യാഭ്യാസ സ്ഥാപനങ്ങള്‍ കേന്ദ്രീകരിച്ച് ലഹരി വില്പന നടത്തുന്ന സംഘത്തിലെ പ്രധാന കണ്ണികളാണ് പിടിയിലായത്. ഇവരെ ചോദ്യം ചെയ്തതില്‍ പ്രദേശത്തെ ലഹരി കടത്ത് സംഘത്തെക്കുറിച്ച് വ്യക്തമായ സൂചന ലഭിച്ചിട്ടുണ്ട്. പിടിയിലായ ലത്തീഫ് കഴിഞ്ഞ ജനുവരിയില്‍ ലഹരി കടത്തിന് പിടിക്കപ്പെട്ട് 2 മാസം മുന്‍പാണ് ജാമ്യത്തില്‍ ഇറങ്ങിയത്. മലപ്പുറം ജില്ലാ പൊലീസ് മേധാവി സുജിത്ത് ദാസ് ഐപിഎസിനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ പ്രതികളെ പിടികൂടിയത്.