കല്‍പറ്റ: മാനന്തവാടി പിലാക്കാവില്‍ കടുവയുടെ ആക്രമണത്തില്‍ പ്രതിഷേധവുമായി പ്രദേശവാസികള്‍. എസ്‌റ്റേറ്റില്‍ മെയാന്‍ വിട്ട രണ്ടു വയസുള്ള പശുക്കിടാവിനെയാണ് കടുവ ആക്രമിച്ചത്. രണ്ടു മാസത്തിനിടെ മൂന്നാമത്തെ വളര്‍ത്തു മൃഗത്തിന് നേരെയാണ് കടുവ ആക്രമിക്കുന്നത്. നാട്ടുകാരുടെ ബഹളം കേട്ടാണ് കടുവ ഓടി പോയതെന്ന് ഉടമ ഉണ്ണി പറഞ്ഞു.
കഴിഞ്ഞ ദിവസങ്ങളില്‍ എസ്‌റ്റേറ്റില്‍ കടുവയെ കണ്ടതായി നാട്ടുകാര്‍ പറഞ്ഞിരുന്നു. വനമേഖലയോട് ചേര്‍ന്നാണ് എസ്‌റ്റേറ്റ് സ്ഥിതി ചെയ്യുന്നത്. കടുവാ അക്രമണം നടന്നിട്ടും ഉചിതമായ നടപടി സ്വീകരിക്കാത്തതില്‍ പ്രദേശവാസികള്‍ പ്രതിഷേധത്തിലാണ്. മാനന്തവാടി റെയ്ഞ്ചറെ നാട്ടുകാര്‍ തടഞ്ഞുവെച്ചു. കടുവയെ കൂട് സ്ഥാപിച്ച് പിടികൂടാന്‍ നടപടി സ്വീകരിക്കണമെന്നാണ് പ്രദേശവാസികളുടെ ആവശ്യം.