കല്‍പ്പറ്റ: വയനാട്ടില്‍ വീണ്ടും കടുവയുടെ ആക്രമണമെന്ന് നാട്ടുകാര്‍. വയനാട് കല്ലുമുട്ടം കുന്നിലാണ് വന്യമൃഗത്തിന്‍െ ആക്രമണം നേരിട്ടത്. ആക്രമണത്തില്‍ ആട് ചത്തു. പ്രദേശവാസിയായ മണിത്തൊട്ടി ബിജുവിന്റെ ഒരു വയസ്സുള്ള ആടിനെയാണ് കൊന്നത്.
പുലര്‍ച്ചെ നാലുമണിയോടെയായിരുന്നു സംഭവം. കടുവയാണ് ആടിനെ ആക്രമിച്ചതെന്ന് നാട്ടുകാര്‍ ആരോപിച്ചു. ആടിന് പറ്റിയ പരിക്കുകള്‍ കടുവയുടെ ആക്രമണത്തിന് സമാനമാണെന്ന് നാട്ടുകാര്‍ പറഞ്ഞു. എന്നാല്‍ വനംവകുപ്പ് കടുവാ ആക്രമണം സ്ഥിരീകരിച്ചിട്ടില്ല. ചില കാല്‍പ്പാടുകള്‍ കണ്ടെത്തിയെങ്കിലും കടുവയുടേതാണോ എന്നതിന് സ്ഥിരീകരണമായിട്ടില്ല.