തൃശൂർ കയ്പമംഗലത്ത് കടലിൽ വഞ്ചി മറിഞ്ഞ് മത്സ്യതൊഴിലാളി മരിച്ചു

തൃശൂർ കയ്പമംഗലത്ത് കടലിൽ വഞ്ചി മറിഞ്ഞ് മത്സ്യതൊഴിലാളി മരിച്ചു. രണ്ട് പേർക്ക് പരിക്കേറ്റു. പെരിഞ്ഞനം സ്മാരകം സ്കൂളിന് സമീപം താമസിക്കുന്ന കുഞ്ഞു മാക്കൻ പുരയ്ക്കൽ സുരേഷ് (52) ആണ് മരിച്ചത്. ഇന്ന് പുലർച്ചെ ആറരയോടെയായിരുന്നു അപകടം. മൂന്നുപീടിക ബീച്ച് പന്തൽ കടവിൽ നിന്ന്
മൂന്ന് പേരുമായി മത്സ്യ ബന്ധനത്തിനിറക്കിയ ചാവൽ ദേത്തെ ബാബ എന്ന വള്ളമാണ് മറിഞ്ഞത്. കരയിൽ നിന്ന് അമ്പത് മീറ്റർ അകലെ വെച്ച് തിരയിൽ മറിയുകയായിരുന്നു. കരയിൽ നിന്നിരുന്ന മറ്റു മത്സ്യതൊഴിലാളികൾ ചേർന്ന് രണ്ട് പേരെ വടം ഇട്ട് രക്ഷപ്പെടുത്തിയെങ്കിലും ഒരാളെ കാണാതാവുകയായിരുന്നു. തുടർന്ന് നടത്തിയ തിരച്ചിലിൽ 100 മീറ്റർ തെക്ക് മാറി ഏഴരയോടെ മൃതദേഹം കണ്ടെത്തി. സീ ഗാർഡുമാരായ ഹുസൈൻ, ഷിജോയ്, മറ്റു മത്സ്യതൊഴിലാളികളും ചേർന്ന് മൃതദേഹം കരക്കെത്തിച്ച് ആംബുലൻസിൽ ആശുപത്രിയിലേക്ക് മാറ്റി. പരിക്കേറ്റ കൂളിമുട്ടം സ്വദേശികളായ ജ്യോതി , രാജേഷ് എന്നിവരെ കൊടുങ്ങല്ലൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. വള്ളത്തിനും, എഞ്ചിനും, വലക്കും കേടുപാടുകൾ സംഭവിച്ചിട്ടുണ്ട്. കയ്പമംഗലം എസ്.എച്ച്.ഒ കൃഷ്ണപ്രസാദിൻ്റെ നേതൃത്വത്തിലുള്ള പോലീസ് സ്ഥലത്തെത്തി മേൽ നടപടികൾ ആരംഭിച്ചു.