തൃശ്ശൂര്‍ റെയില്‍വെ സ്റ്റേഷനില്‍ പെട്രോളുമായി യുവാവ് അറസ്റ്റില്‍. ബംഗലളൂരു-കന്യാകുമാരി ഐലന്റ് എക്‌സ്പ്രസില്‍ വന്ന യുവാവാണ് അറസ്റ്റില്‍ ആയത്. രണ്ടര ലിറ്റര്‍ പെട്രോളാണ് യുവാവിന്റെ കൈവശം ഉണ്ടായിരുന്നത്.
കോട്ടയം സ്വദേശി സേവിയര്‍ വര്‍ഗീസിനെയാണ് ആര്‍പിഎഫ് അറസ്റ്റ് ചെയ്തത്. ബംഗളൂരുവില്‍ നിന്ന് തൃശ്ശൂരിലെത്തിയതാണ് സേവിയര്‍ വര്‍ഗീസ്. ട്രെയിനില്‍ വാഹനം കയറ്റി വിട്ടിരുന്നു. ആ വാഹനത്തിന്റെ പെട്രോള്‍ ആണ് കുപ്പിയില്‍ കരുതിയിരുന്നതെന്ന് യുവാവ് മൊഴി നല്‍കിയത്.
വാഹനം പാര്‍സല്‍ അയക്കുമ്പോള്‍ ടാങ്കില്‍ പെട്രോള്‍ ഉണ്ടാകരുത് എന്നതിനാല്‍ ആണ് പെട്രോള്‍ കുപ്പിയില്‍ സൂക്ഷിച്ചത് എന്നാണ് ഇയാള്‍ പറയുന്നത്. ട്രെയിനില്‍ യാത്ര ചെയ്യുമ്പോള്‍ പെട്രോളിയം ഉല്‍പ്പന്നങ്ങള്‍ അടക്കം എളുപ്പം തീപിടിക്കുന്ന വസ്തുക്കള്‍ കൈയില്‍ കരുതരുതെന്നാണ് റെയില്‍വേയുടെ നിര്‍ദേശം.