തൃശ്ശൂര്‍: തൃശൂര്‍ പൂരത്തെ അധിക്ഷേപിച്ചുകൊണ്ട് പോസ്റ്റിട്ട യുവാവിനെ ജോലിയില്‍ നിന്ന് പുറത്താക്കി. ഫഹദ് കെ.പി എന്ന് പേരുള്ള യുവാവായിരുന്നു പൂരത്തെ അധിക്ഷേപിച്ചുകൊണ്ട് ഫേസ്ബുക്കില്‍ പോസ്റ്റിട്ടത്. ഇയാളുടെ പോസ്റ്റ് പ്രത്യക്ഷപ്പെട്ടതോടെ പൂരപ്രേമികളും പ്രതിഷേധവുമായി രംഗത്തെത്തി. പ്രതിഷേധം കനത്തതോടെ മാരുതി സുസുക്കിയുടെ എ.എം മോട്ടേഴ്‌സില്‍ നിന്ന് പുറത്താക്കിയതായി കമ്പനി അറിയിക്കുകയായിരുന്നു.
ഫേസ്ബുക്കിലെ ഇയാളുടെ പോസ്റ്റ് സ്‌ക്രീന്‍ ഷോട്ട് എടുത്തുകൊണ്ടായിരുന്നു പ്രതിഷേധം. പൂരത്തേയും കലയേയും സ്‌നേഹിക്കുന്ന മലയാളികള്‍ ഫഹദിനെതിരെ പ്രതിഷേധിക്കണം എന്നായിരുന്നു ആവശ്യം. മാരുതി സുസുക്കിയുടെ എ എം മോട്ടേഴ്‌സിലായിരുന്നു ഇയാള്‍ ജോലി ചെയ്തത്. പൂരപ്രേമികള്‍ ഓഫീസിലടക്കം വിളിച്ച് പ്രതിഷേധം അറിയിക്കുകയും ചെയ്തു. വിമര്‍ശനങ്ങള്‍ ശക്തമായതോടെ ഇയാളെ ജോലിയില്‍ നിന്ന് പുറത്താക്കിയതായി കമ്പനി അറിയിച്ചു. സ്ഥാപനത്തിന് മോശം പേരുണ്ടാക്കിയെന്നുകാട്ടിയാണ് ഫഹദിനെ പുറത്താക്കിയതെന്നാണ് കമ്പനി വാദം.