യുവാവിനെ കുത്തിയ കേസില്‍ മൂന്നുപേര്‍ പിടിയില്‍

യുവാവിനെ കുത്തി മാരകമായി പരിക്കേല്‍പിച്ച കേസില്‍ മൂന്നുപേര്‍ അറസ്റ്റില്‍. ചാത്തന്നൂര്‍ കാരംകോട് അതിര്‍ത്തിവിള വീട്ടില്‍ സോപ്പുണ്ണി എന്ന അരുണ്‍ സിങ് (29), ഏറം താന്നിവിള വീട്ടില്‍ സജീവ് (39), കാരംകോട് ചരുവിള പുത്തന്‍ വീട്ടില്‍ രാഹുല്‍ (30) എന്നിവരാണ് ചാത്തന്നൂര്‍ പൊലീസിന്റെ പിടിയിലായത്.

പ്രതികള്‍ ഈ മാസം 14ന് രാത്രി 9.30ന് കോതേരിയിലുള്ള ബേക്കറിയിലെത്തി ജ്യൂസ് കുടിക്കുന്നതിനിടയില്‍ കടയുടമയായ യുവതിയോട് മോശമായി പെരുമാറുകയും ചെയ്തു. ഇത് ചോദ്യംചെയ്ത യുവതിയുടെ സുഹൃത്തുക്കളായ അനന്തുവിനെയും അഭിലാഷിനെയും ആക്രമിക്കുകയും കട അടിച്ചുതകര്‍ക്കുകയുമായിരുന്നു.

ആക്രമണത്തിനിടയില്‍ വയറ്റില്‍ കുത്തേറ്റ അഭിലാഷ് ചികിത്സയിലാണ്. ചാത്തന്നൂര്‍ എ.സി.പി ബി. ഗോപകുമാറിന്റെ നിര്‍ദേശാനുസരണം ഇന്‍സ്‌പെക്ടര്‍ ശിവകുമാറിന്റെ നേതൃത്വത്തിലുള്ള സംഘമാണ് പ്രതികളെ പിടികൂടി.