കേന്ദ്രം ഭരിക്കുന്ന ബിജെപി സര്‍ക്കാരിനെതിരെ ആഞ്ഞടിച്ച് കോണ്‍ഗ്രസ് നേതാവ് രാഹുല്‍ ഗാന്ധി. നിലവിലുള്ളത് മോദി സര്‍ക്കാര്‍ അല്ലെന്നും അംബാനി-അദാനി സര്‍ക്കാര്‍ ആണെന്നും അദ്ദേഹം തുറന്നടിച്ചു. ഭാരത് ജോഡോ യാത്രയില്‍ ചെങ്കോട്ടയില്‍ ജനങ്ങളെ അഭിസംബോധന ചെയ്യുകയായിരുന്നു അദ്ദേഹം.
2800 കിലോമീറ്റര്‍ ഏറെയാണ് ഞാന്‍ ഈ യാത്രയില്‍ നടന്നത്, എന്നാല്‍ രാജ്യത്തെ കര്‍ഷകര്‍ പന്ത്രണ്ടായിരം മുതല്‍ 15,000 കിലോമീറ്റര്‍ വരെയാണ് ജീവിതത്തിലുടനീളം നടക്കുന്നത്. കര്‍ഷകരും ചെറുകിട വ്യാപാരികളും അവരുടെ വായ്പ ബാങ്കുകളില്‍ അടച്ചു കൊണ്ടിരിക്കുകയാണ്. എന്നാല്‍ രാജ്യത്തെ ചില ശതകോടീശ്വരന്മാര്‍ക്ക് ലക്ഷക്കണക്കിന് കോടി രൂപയാണ് നല്‍കുന്നത് അദ്ദേഹം പറഞ്ഞു.
കൂടാതെ യഥാര്‍ത്ഥ പ്രശ്‌നത്തില്‍ നിന്നും ശ്രദ്ധ തിരിക്കുന്നതിന് 24 മണിക്കൂറും ഹിന്ദു-മുസ്ലിം വിദ്വേഷം പ്രചരിപ്പിക്കുകയാണെും രാഹുല്‍ കുറ്റപ്പെടുത്തി. മാധ്യമങ്ങള്‍ നല്ല സുഹൃത്തുക്കളാണ് എന്നാല്‍ അവര്‍ ഒരിക്കലും യാഥാര്‍ത്ഥ്യത്തെ കാണിക്കുന്നില്ല കാരണം പിന്നാമ്പുറത്ത് ഗൂഢാലോചന നടക്കുന്നുണ്ട് എന്നാല്‍ ഈ രാജ്യം ഒന്നാണ് എല്ലാവരും സൗഹൃദത്തോടെ ജീവിക്കാന്‍ ആഗ്രഹിക്കുന്നുവെന്നും രാഹുല്‍ കൂട്ടിച്ചേര്‍ത്തു.
അതേസമയം ഉലകനായകന്‍ കമലഹാസന്‍ ഭാരത് ജോഡോ യാത്രയില്‍ ഇന്ന് പങ്കുചേര്‍ന്നു. കോണ്‍ഗ്രസ് നേതാക്കളായ സോണിയ ഗാന്ധി പ്രിയങ്ക ഗാന്ധി ജയറാം രമേശ് തുടങ്ങി വലിയ കോണ്‍ഗ്രസ് നിരയും റാലിയില്‍ പങ്കെടുത്തിരുന്നു.
യാത്ര ശനിയാഴ്ച വൈകിട്ട് ചെങ്കോട്ടയില്‍ താല്‍ക്കാലിക വിരാമം ആകും. ഒമ്പത് ദിവസത്തെ വിശ്രമത്തിനുശേഷം ജനുവരി മൂന്നിന് യാത്ര പുനരാരംഭിക്കും.