തുലാവര്‍ഷത്തിന്റെ തുടക്കത്തില്‍ തിരുവനന്തപുരം ജില്ലയില്‍ കനത്തമഴ. അഗസ്ത്യ വനമേഖലയില്‍ ശക്തമായ മഴയെ തുടര്‍ന്ന് ജലനിരപ്പ് ഉയര്‍ന്നതോടെ നെയ്യാര്‍ ഡാമിന്റെ നാലു ഷട്ടറുകള്‍ രണ്ടര അടി വീതം ഉയര്‍ത്തി. 84.50 അടിയാണ് അണക്കെട്ടിലെ ജലനിരപ്പ് .നെയ്യാറിന്റെ തീരത്തുള്ളവര്‍ ജാഗ്രത പാലിക്കണം. പേപ്പാറ ഡാമിന്റെ ഒരു ഷട്ടര്‍ എട്ടുമണിയോടെ ഒരടി ഉയര്‍ത്തി. ഇന്നലെ വൈകിട്ട് നാലുമണിയോടെ തുടങ്ങിയ മഴ പലയിടത്തും ഇപ്പോഴും തുടരുകയാണ്.
നെയ്യാറിന്റെ ഇരുകരകളിലും താമസിക്കുന്നവര്‍ ജാഗ്രത പാലിക്കണമെന്ന് ജലസേചന വകുപ്പ് അറിയിച്ചു. തിരുവനന്തപുരം, കൊല്ലം, ആലപ്പുഴ, പത്തനംതിട്ട ജില്ലകളില്‍ ശനിയാഴ്ച ശക്തമായ മഴയ്ക്കു സാധ്യതയുണ്ടെന്ന് കാലാവസ്ഥാനിരീക്ഷണ കേന്ദ്രം അറിയിച്ചു.