മാധ്യമ പ്രവർത്തകർക്കെതിരായ പട്ടി പ്രയോഗത്തിൽ മാപ്പു പറയില്ലെന്ന് സിപിഎം സംസ്ഥാന കമ്മിറ്റി അംഗം എൻ.എൻ കൃഷ്ണദാസ്. പ്രതികരണം തേടാനെത്തിയ മാധ്യമപ്രവർത്തകർക്കെതിരെയാണ് കൃഷ്ണദാസ് വിവാദ പരാമർശം നടത്തിയത്. മാധ്യമ പ്രവർത്തകരെ പട്ടികൾ എന്ന് വിളിച്ചത് വളരെ ആലോചിച്ച് പറഞ്ഞതാണെന്നും കൊതിമൂത്ത നാവുമായി നിൽക്കുന്നവരെയാണ് വിമർശിച്ചതെന്നും അദ്ദേഹം പറഞ്ഞു.
മാധ്യപ്രവർത്തകർ വലതുപക്ഷക്കാരാണെന്നും കെയുഡബ്ളിയുഡജെയുടെ മാപ്പ് ആവശ്യപ്പെട്ടുള്ള പ്രസ്ഥാവന നാലായി മടക്കി പോക്കറ്റിൽ വച്ചാൽ മതിയെന്നും അദ്ദേഹം പറഞ്ഞു. സിപിഎം മുൻ ഏരിയ കമ്മിറ്റ് അംഗം അബ്ദുൽ ഷുക്കൂർ പാർട്ടി വിട്ട വാർത്ത നൽകിയതിനെതിരെയായിരുന്നു മാധ്യമപ്രവർത്തകരെ എൻഎൻ കൃഷ്ണദാസ് അധിക്ഷേപിച്ചത്. പാർട്ടി അനുനയിപ്പിച്ച ഷുക്കൂർ എൽഡിഎഫ് കൺവെൻഷന് എത്തിയപ്പോഴാണ് എൻഎൻ കൃഷ്ണദാസ് ഇത്തരത്തിൽ സംസാരിച്ചത്.
ഇറച്ചിക്കടയിൽ പട്ടികൾ നിൽക്കുന്നതുപോലെയാണ് ഷുക്കൂറിന്റെ വീടിന് മുന്നിൽ മാധ്യപ്രവർത്തകർ നിന്നതെന്നും നിങ്ങൾക്ക് ലജ്ജയില്ലേ എന്നു ചോദിച്ചുമാണ് കൃഷ്ണദാസ് മാധ്യമപ്രവർത്തകരോട് തട്ടിക്കയറിയത്.