ലണ്ടന്‍: ഇംഗ്ലീഷ് പ്രീമിയര്‍ ലീഗ് സീസണ്‍ ആരംഭിച്ചതേയുള്ളു… പക്ഷേ മാഞ്ചസ്റ്റര്‍ യുനൈറ്റഡില്‍ കാര്യങ്ങള്‍ അത്ര തൃപ്തികരമല്ല. നാളെ പ്രീമിയര്‍ ലീഗ് മല്‍സരങ്ങള്‍ പുനരാരംഭിക്കവെ താരങ്ങള്‍ പരിശീലനത്തില്‍ ജാഗ്രത പാലിക്കുന്നില്ല എന്ന വിഷയത്തില്‍ ആന്റണി മാര്‍ഷലിനെ കോച്ച് തിരിച്ചയച്ചതായാണ് പുതിയ വാര്‍ത്ത.
രാവിലെ ഒമ്പതിന് താരങ്ങളോട് റിപ്പോര്‍ട്ട് ചെയ്യാന്‍ പറഞ്ഞെങ്കിലും ആന്റണി 11-30 നാണ് റിപ്പോര്‍ട്ട് ചെയ്തത്. സ്വന്തം കാറില്‍ അദ്ദേഹം പരിശീലന മൈതാനത്ത് എത്തി അതേ വേഗതയില്‍ തന്നെ തിരികെ പോവുന്നതും കണ്ടു. ശക്തരായ ബ്രൈട്ടണുമായാണ് യുനൈറ്റഡിന്റെ മല്‍സരം. രണ്ടാഴ്ച്ചയിലെ രാജ്യാന്തര അവധിക്ക് ശേഷമായിരുന്നു ഇന്നലെ പരിശീലനം ആരംഭിച്ചത്. ഇതോടൊപ്പം തന്നെ കോച്ച് എറിക് ടെന്‍ ഹാഗനുമായി പല സീനിയര്‍ താരങ്ങളും അത്ര നല്ല ബന്ധത്തില്ലല്ല എന്ന റിപ്പോര്‍ട്ടും വരുന്നു. ഇംഗ്ലീഷ് ദേശീയ താരം ജാദോണ്‍ സാഞ്ചോ കഴിഞ്ഞ ദിവസം പ്രത്യക്ഷത്തില്‍ തന്നെ കോച്ചിനെതിരെ സംസാരിച്ചിരുന്നു. പരിശീലനത്തില്‍ വേണ്ടത്ര മികവിലെത്താന്‍ സാഞ്ചോക്ക് കഴിയുന്നില്ല എന്ന് കോച്ച് പറഞ്ഞിരുന്നു. ഇതിനെതിരെയാണ് താരം രംഗത്ത് വന്നത്.