കോയമ്പത്തൂര്‍: പട്ടാപ്പകല്‍ ജില്ലാക്കോടതിയുടെ മുന്നില്‍ വെച്ച് 5 അംഗ സംഘം ചേര്‍ന്ന യുവാവിനെ വെട്ടിക്കൊന്നു. നഗരത്തിലെ തിരക്കേറിയ റെയില്‍ വേ സ്‌റ്റേഷനു സമീപത്തെ നടുറോട്ടില്‍ ഭീകരാന്തരീക്ഷം സൃഷ്ടിച്ചാണ് യുവാവിനെ വെട്ടിക്കൊലപ്പെടുത്തിയത്. വടിവാള്‍ ഉപയോഗിച്ചാണ് കൊലപാതകം നടത്തിയത്.
കോയമ്പത്തൂര്‍ ശരവണം പെട്ടി കീരനക്കം സ്വദേശി ഗോകുല്‍ (23) ആണ് മരിച്ചത്. കൂടെയുണ്ടായിരുന്ന സുഹൃത്ത് ശിവാനന്ദ് കോളനി സ്വദേശി മനോജ് (25) നും ഗുരുതരമായി പരിക്കേറ്റു. മനോജിനെ കോയമ്പത്തൂര്‍ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
മുന്‍വൈരാഗ്യത്തെ തുടര്‍ന്നാണ് കൊലപാതകം നടന്നതെന്ന് സംശയിക്കുന്നു. ഇരുവരും മറ്റൊരു കൊലപാതകവുമായി ബന്ധപ്പെട്ട കേസില്‍ ജാമ്യത്തില്‍ ഇറങ്ങിയപ്പോഴാണ് ആക്രമം ഉണ്ടായത്. ആക്രമണത്തെ തുടര്‍ന്ന് റെയില്‍ വേ സ്‌റ്റേഷന് സമീപവും കോടതി പരിസരത്തും തിരക്കേറിയ വീഥികളിലും പോലീസിനെ വിന്യസിച്ചിട്ടുണ്ട്. പ്രതികള്‍ക്കായി തിരച്ചില്‍ ഊര്‍ജിതമാക്കിയിട്ടുണ്ട്.