ഭോപ്പാല്‍: നാള്‍ക്കുനാള്‍ വില വര്‍ധിക്കുന്നതിനിടെ തക്കാളി കുടുംബ കലഹത്തിനും ഇടയാക്കുന്നു. കറിയില്‍ രണ്ട് തക്കാളി ഇട്ടതിന് ഭാര്യ യുവാവിനെ ഉപേക്ഷിച്ചു. മധ്യപ്രദേശിലെ ഷഹ്‌ദോലിലാണ് സംഭവം. സന്ദീപ് ബര്‍മനെയാണ് ഭാര്യ ആരതി ബര്‍മന്‍ ഉപേക്ഷിച്ചു പോയത്. തക്കാളിയുടെ പേരില്‍ ഭാര്യ പിണങ്ങി പോയതായി സന്ദീപ് തന്നെയാണ് പൊലീസില്‍ പരാതി നല്‍കിയത്. മകളെയും കൊണ്ട് തന്റെ ഭാര്യ വീടു വിട്ടിറങ്ങിയെന്നും ഒരു ബസില്‍ കയറി പോയെന്നും പരാതിയില്‍ പറയുന്നു.
ഭാര്യ തിരികെ വരുമെന്ന് കരുതിയെങ്കിലും ഏറെ സമയം കഴിഞ്ഞിട്ടും കണ്ടില്ല. പ്രദേശത്താകെ അന്വേഷിച്ചിട്ടും കണ്ടെത്താനായില്ല. തുടര്‍ന്ന് പൊലീസ് സ്റ്റേഷനിലെത്തി പരാതിപ്പെടുകയായിരുന്നു. ഉച്ചഭക്ഷണം ഉണ്ടാക്കി വിതരണം ചെയ്യുന്ന ജോലിയാണ് ഇയാള്‍ക്ക്. മൂന്നു ദിവസം മുമ്പ് ഭാര്യയോട് ചോദിക്കാതെ രണ്ട് തക്കാളിയെടുത്ത് കറിവെച്ചു. ഇതറഞ്ഞ ഭാര്യ ഇയാളുമായി വഴക്കായി. പരസ്പരം തര്‍ക്കം മൂര്‍ച്ഛിച്ചതോടെ യുവതി കുഞ്ഞിനെയുമെടുത്ത് വീടുവീട്ടിറങ്ങുകയായിരുന്നു. അതേസമയം, ഭര്‍ത്താവുമായി വഴക്കിട്ട ആരതി സഹോദരിയുടെ വീട്ടില്‍ സുരക്ഷിതയാണെന്ന് പൊലീസ് അറിയിച്ചു.