ഉരുള്‍പൊട്ടലില്‍ തകര്‍ന്ന വയനാട്ടിൽ യൂത്ത് ലീഗിന്റെ വൈറ്റ് ഗാർഡ് ഏർപ്പെടുത്തിയ ഊട്ടുപുര പൂട്ടിച്ചതോടെ ഭക്ഷണം കിട്ടാതെ രക്ഷാപ്രവർത്തകർ. കഴിഞ്ഞ ദിവസങ്ങളിൽ മൂന്നു നേരവും ഇവിടെനിന്നാണ് രക്ഷാപ്രവർത്തകർ രാഷ്ട്രീയമോ മതമോ നോക്കാതെ ഭക്ഷണം കഴിച്ചിരുന്നത്. എന്നാൽ അപ്രതീക്ഷിതമായി ഭക്ഷണവിതരണം നിർത്താൻ പൊലീസ് ആവശ്യപ്പെടുകയായിരുന്നു.
ഇതോടെ ഇന്ന് സ്ഥലത്തെത്തിയ നിരവധി പേർ ഭക്ഷണം കിട്ടാതെ പ്രയാസപ്പെടുകയാണെന്ന് മാധ്യമങ്ങൾ റിപ്പോർട്ട് ചെയ്തു. വളരെ വൈകിയാണ് പലർക്കും പ്രഭാത ഭക്ഷണം കിട്ടിയത്. യൂത്ത് ലീഗിന്റെ സംവിധാനം നിർത്തിച്ചെങ്കിലും ഇത്രയും പേർക്ക് പകരം ഭക്ഷണ സംവിധാനം ഏർപ്പെടുത്താൻ സർക്കാർ ഇതുവരെ യാതൊന്നും ചെയ്തിട്ടില്ല എന്നാണ് രക്ഷാപ്രവർത്തകർ പറയുന്നത്.