കെ റെയില്‍ വിഷയത്തില്‍ പ്രതികരിച്ച് മുസ്ലിം ലീഗ് ദേശീയ ജനറല്‍ സെക്രട്ടറിയും നിയമസഭാ പാര്‍ട്ടി നേതാവുമായ പികെ കുഞ്ഞാലിക്കുട്ടി.പൗരന്റെ സ്വസ്ഥ ജീവിതത്തിനാണ് വികസനം. അല്ലാതെ ജനങ്ങളുടെ മേല്‍ ഭയവും, അരാജകത്വവും നിറക്കുന്നത് വികസനമല്ല. മര്‍ദ്ദക മാര്‍ഗത്തിലൂടെയല്ല വികസനം സാധ്യമാക്കേണ്ടത് അദ്ദേഹം പറഞ്ഞു.
ഇത്തരം അനുഭവങ്ങള്‍ ലോകത്തെമ്പാടും മുന്‍കാലങ്ങളില്‍ ഉണ്ടായിട്ടുണ്ട്. അതിന്റെ പരിണിത ഫലങ്ങള്‍ ബന്ധപ്പെട്ടവര്‍ അനുഭവിച്ചിട്ടുമുണ്ട്. ഇതില്‍ നിന്നുമൊന്നും പാഠം പഠിക്കാന്‍ തയ്യാറാകാത്ത ഭരണാധികാരികളെ ജനം തിരുത്തിക്കും. കെ റെയില്‍ കേരളത്തിന്റെ കണ്ണീരാവുകയാണ്. ഭരണകൂടം ഇതില്‍ നിന്നും പിന്മാറണം. ജനത്തെ വിശ്വാസത്തിലെടുക്കണം പികെ കുഞ്ഞാലിക്കുട്ടി ഓര്‍മ്മപ്പെടുത്തി.
കെ റെയില്‍ പോലീസ് അതിക്രമത്തില്‍ പ്രതിഷേധിച്ച് പ്രതിപക്ഷം സഭ ഇന്ന് ബഹിഷ്‌ക്കരിച്ചിരുന്നു.
അതേസമയം പ്രതിപക്ഷ നേതാവിന്റെ നേതൃത്വത്തില്‍ യു.ഡി.എഫ് നേതാക്കള്‍ മാടപ്പള്ളിയിലേക്ക് തിരിച്ചു.ഉച്ചയോടെ മാടപ്പള്ളിയില്‍ എത്തും.