സംസ്ഥാന പൊതുമേഖലാ സ്ഥാപനങ്ങളിലെ പെന്‍ഷന്‍ പ്രായം ഉയര്‍ത്തിയ തീരുമാനം പാര്‍ട്ടി അറിഞ്ഞിരുന്നില്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്‍.പാര്‍ട്ടിയോട് ചര്‍ച്ച ചെയ്യാതെയാണ് ഉത്തരവ് പുറപ്പെടുവിച്ചതെന്നും പാര്‍ട്ടിയില്‍ ചര്‍ച്ച ചെയ്യാതെ എങ്ങനെയാണ് ഉത്തരവ് പുറപ്പെടുവിച്ചെന്ന കാര്യം പരിശോധിക്കുമെന്നും ദി ന്യൂ ഇന്ത്യന്‍ എക്‌സ്പ്രസിന് നല്‍കിയ അഭിമുഖത്തില്‍ എംവി ഗോവിന്ദന്‍ പറഞ്ഞു.
ശനിയാഴ്ച ചേര്‍ന്ന മന്ത്രിസഭാ യോഗമാണ് പെന്‍ഷന്‍ പ്രായം 60 വയസ്സായി ഏകീകരിക്കണമെന്ന വിദഗ്ദ്ധ സമിതിയുടെ റിപ്പോര്‍ട്ട് നടപ്പാക്കാന്‍ തീരുമാനിച്ചത്. എന്നാല്‍ ഭരണ-പ്രതിപക്ഷ യുവജന സംഘടനകളുടെ കടുത്ത എതിര്‍പ്പിനെ തുടര്‍ന്ന് കഴിഞ്ഞ ദിവസം ഉത്തരവ് പിന്‍വലിക്കേണ്ടി വന്നത് സര്‍ക്കാരിന് തിരിച്ചടി ആയിരുന്നു. പിന്നാലെയാണ് പാര്‍ട്ടി സെക്രട്ടറിയുടെ വെളിപ്പെടുത്തല്‍.