കെ. റെയിലിനെതിരെ നടക്കുന്ന പ്രക്ഷോഭങ്ങളെ വികസന വിരോധികളെന്നും തീവ്രവാദികളെന്നും കോ-ലീ-ബി സഖ്യമെന്നുമുള്ള യമണ്ടന്‍ ന്യായങ്ങള്‍ ചമക്കുന്ന സി.പി.എമ്മിനെതിരെയുള്ള കനത്ത താക്കീതാണ് ഇന്ന് മുസ്ലിം യൂത്ത് ലീഗ് പ്രവര്‍ത്തകര്‍ നല്‍കിയതെന്ന് മുസ്‌ലിംലീഗ് എംഎല്‍എ നജീബ് കാന്തപുരം.കോഴിക്കോട് ജില്ലാ യൂത്ത് ലീഗ് കമ്മിറ്റി സംഘടിപ്പിച്ച കലക്ടറേറ്റ് മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സംസ്ഥാനത്തെ എല്ലാ ജില്ലകളിലും യൂത്ത് ലീഗ് നടത്തിയ ഉജ്ജ്വലമായ മാര്‍ച്ച് കെ റെയിലിനെതിരെയുള്ള ജനകീയ സമരത്തെ ഒറ്റി കൊടുക്കുന്നവര്‍ക്കെതിരായിട്ടുള്ള താക്കീതായി മാറിയെന്ന് അദ്ദേഹം പറഞ്ഞു.
കെ റെയില്‍ സംബന്ധമായി നിയമസഭയില്‍ വ്യക്തമായ ഒരു ഉത്തരം നല്‍കാന്‍ സര്‍ക്കാര്‍ തയ്യാറായിട്ടില്ല. മന്ത്രിമാര്‍ക്ക് പോലും കൃത്യമായ അറിവില്ല. ബഫര്‍ സോണ്‍ ഉണ്ട് എന്ന് പാര്‍ട്ടി സെക്രട്ടറിയും ഇല്ലെന്നു മന്ത്രിയും പറയുന്നു. നഷ്ടപരിഹാരത്തിന്റെ
കാര്യത്തിലും അവ്യക്തത നിലനില്‍ക്കുകയാണ് അദ്ദേഹം പറഞ്ഞു.
കുടിയിറങ്ങി പോകണമെന്ന് ഭീഷണിപ്പെടുത്തുന്നവര്‍ക്ക് കുടിയിറക്കപ്പെടുന്നവരുടെ ദുഃഖം മനസ്സിലാവുന്നില്ല. ഇപ്പോള്‍ കേരളത്തില്‍ നടക്കുന്നത് അതിജീവനത്തിനു വേണ്ടിയുള്ള ഒരു ജനതയുടെ പോരാട്ടമാണ്. എല്ലാം നഷ്ടപ്പെടുന്നവരുടെ വിലാപമാണ്. അതിനെ അഭിസംബോധന ചെയ്യുന്നതിന് പകരം വെല്ലുവിളിയും കൈയേറ്റവുമാണ് ബന്ധപ്പെട്ടവരുടെ ഭാഗത്ത് നിന്നുണ്ടാവുന്നത്.
കേരള ജനത ഒന്നടങ്കം വേണ്ട എന്ന് പറയുന്ന ഒരു പദ്ധതി നടപ്പാക്കാന്‍ സര്‍ക്കാര്‍ കാണിക്കുന്ന അമിത താല്പര്യത്തിന് പിന്നില്‍ ദുരൂഹതയുണ്ട്. പോലീസിനെയും പാര്‍ട്ടി പടയെയും ഉപയോഗിച്ച് മനുഷ്യരുടെ നെഞ്ചില്‍ കുറ്റി തറക്കാന്‍ ശ്രമിച്ചാല്‍ പ്രതിരോധിക്കാന്‍ മുസ്ലിം യൂത്ത് ലീഗ് മുന്നിലുണ്ടാവും അദ്ദേഹം ചൂണ്ടിക്കാട്ടി.